Kut hnathawktute'n kan sorkar hunah lei rem an rap ang - Lalduhoma

Zoram Peoples' Movement (ZPM) leader Lalduhoma, MLA chuan, ZPM a sorkar hun hunah kut hnathawktute'n lei rem an rah tur thu a sawi.

Nimina an party pisaa chhung inkhawmah thu sawiin Lalduhoma chuan, tunlai hian sawhthing leitute'n loneitute chu an kawtkaiah kg. khat Rs. 47-a lei an dil mek thu a sawi a, "ZPM a sorkar chuan, sorkarin sawhthing hi kg. khat Rs. 50-a lei kan tiam a, lei theitu nih kan tlin ta lo. Lo tling hlauh ila chuan kumin aṭang pawhin kut hnathawktute'n lei rem an rap ṭan nghal ang," a ti.

ZPM Leader chuan, state sorkarin kut hna-thawktute thláwpin ṭanpui lâwk duh se, chhungkaw tam tak an din chhuah tur thu sawiin, "Mahse, sorkar berin a kut a kuangkuah tlat hi a pawi kan ti hle a ni," a ti a; ZPM a sorkar hun hunah kut hnathawktute'n lei rem an rah zui tawh tur thu a sawi.

ZPM senior vice chairman Rev. Dr K Thanzauva pawhin thu sawiin, Pathianin mihring chauh ni lo, khawvel pawh a hmangaih thu a sawi a, "Tute hnam emaw, tute pawl bik emaw chauh pawh a hmangaih lo a, hnam tin, pawl tin a hmangaih vek. Pathian ringtute hian Pathian rilru ṭâwmpuiin, kan mihringpui te, kan party mi kher lote pawh kan hmangaih tur a ni," a ti.

Hmangaih bik neih chu Pathian duh dan nen a inkalh tih political party, a bikin ruling party apiangin an hriat a pawimawh tih sawiin Dr K Thanzauva chuan, "Chu chu politics dik tak chu a ni. Pathian duh dan zâwm chungin politics a khelh theih," a ti a; Pathian duh dana politics khelh chu ram siamna atan a pawimawh thu a sawi.