Zokhumi thattu man ngei turin YMA-in Chief Secretary an ngen

Mission Veng Branch YMA chuan nimin khan chief secretary Lalnunmawia Chuaungo hnenah lehkha an thehlut a; December 18, 2014-a a pindana thah Zokhumi w/o J Lalsangzuala, Mission Veng thattu chhui chhuah a ni ngei theih nana hma la turin an ngen.

Mission Veng Branch YMA chuan a lehkhaah hian, Zokhumi thattu chhui chhuah chungchangah sorkar hmalakna chuan a chhui chhuak zawngin hmasawnna a nei lo niin chanchinbuah tarlan a nih avangin, hrehawm an tih thu an ziak a, "Hetianga kan Branch member thihna chhan leh a thattu chhui chhuah theih loha a awm reng hi a ná kan tiin, hrehawm kan ti tak meuh a ni," an ti.

Mizoramah tualthat-tute man chhuah loha an awm leh zalen taka an awm zui tâk sawi tur a awm fo nia sawiin Mission Veng Branch YMA chuan, "Kan ram leh a chhunga chengte tan pawh a him lo a, sorkar tan pawh a hmingchhiatthlak hlein kan hria," an ti a; Zokhumi thattu a rang thei ang bera zawng chhuak ngei tur leh chutiang tur chuan chak zawka hma laksak turin Chief Secretary an ngen a ni.

KṬP dintute zinga mi, Zokhumi (83) hi Mission Venga an inah December 18, 2014 zing dar 9:30 velah a khumah thia hmuh a ni a, chemtea vih hlum nia hriat a ni. Zokhumi mut pindana almirah chu nasa taka hâi darh a ni a, Rs. 64,000 vel a bo a ni. Zokhumi thattua puh Lalrempuia (36), Kulikawn chu police-in an man hnuah, December 24, 2014 zanlai velah a inpuang. Lalrempuia chu police-te'n December 25, Krismas ni zing khawvar hmain Magistrate hmaah an hruai nghal a, Magistrate phalnain Central Jail-ah dah luh nghal a ni.