Fall armyworm do turin ṭan chi kima kan ṭan a ngai - Agriculture Minister

Agriculture minister C Lalrinsanga chuan nimin khan an party pisa, Mizo Hnam Rûna inkhawmah thu sawiin, tunlaia lo neitute thlai ei chhe mektu fall armyworm do turin ṭan chi kima ṭan a ngaih thu a sawi.

Minister C Lalrinsanga chuan, fall armyworm chu April 8, 2019-ah an buaipui tawh tih sawiin, "Nghasih ruama hmuh a nih tirh khan kal turin ka insiam vek tawh a, Model Code of Conduct vanga buai ka hlauh avangin ka ṭhulh leh. Theihtawp chhuaha fall armyworm do tur hian department lam ka hrilh a, department lam pawhin an theihtawp tak meuh an chhuah. Office nghaktu mumal pawh awm loa fall armyworm an buaipui tâkah chuan, 'Vai vaia buaipui chu a fel lo e,' tiin a buaipui zual biktu tur Rapid Responce Team kan din ta chauh zawk a ni," a ti.

Fall armyworm-te chu an inthlah pung chak hle a, an chimawm tak zet tih sawiin C Lalrinsanga chuan, "Hmanrua kan neih zawng zawng hmangin he rannung hi kan bei a ni. Central YMA pawh thawhpuiah kan sawm hial rêng a ni. Action plan hrang hrang kan nei a, kan theihtawpin kan do mek zel," a ti a; khawvel ram danga an beih dante an zir bakah, phai aṭangin scientist rual an lo thleng thuai dawn tih a sawi.

C Lalrinsanga chuan, Agriculture minister a nihna anga a vei chu - Mizorama thlai thar chhuah theihte'n tapchhak záwl a luahlum tâwk lo chu a nih thu a sawi a, "Purûn, âlù, tél, buhfai leh purûn vár tal hi chu intodelh turin kan kut hnathawktute ka cho duh. Buhfai phei chu, kan thar chhuah hi Supply department-in a lei thei dawn a ni," a ti.