Congress nena kan thawh dunna Lok Sabha leh by-election atan chauh a ni - ZPM Sr.VC

ZPM senior vice chairman Rev. Darchungnunga chuan nimin khan ZPM pisaa inkhawm­ah thu sawiin, Cong­ress party nena an thawh dunna chu Lok Sabha inthlanpui leh MLA by-election atan chauh a ni a, thil dang sawi tel a awm lo tih a sawi.

Rev. Darchungnunga chuan, Lok Sabha inthlanpui leh MLA by-election-a ZPM leh Cong­ress party thawk dun chuan ZPM-a beiseina sang tak nei mi ṭhenkhatte rilru a tiná tih an hriat thu a sawi a, "ZPM-ah ram tana rinna leh beiseina an lo nghah vang nia a lan avangin lawmawm kan ti. Lok Sabha inthlanah Mizorama rorelna chauh tin zâwn a hun lo a, kan ram, kan hnam leh kan sakhaw himna turin theih­­tawp chhuaha ṭanho hun nia kan hriat vang a ni ber," a ti.

'Zu zuar thawhpui' tiin mi ṭhenkhatin ZPM an sawi tih sawiin Rev. Darchungnunga chuan, "He thu hi MNF-te'n an sawi uar a ni âwm e. Congress sorkar zu zawrh chhung zawnga zu zuar hotupa, zu zawrh enkawltu minister, zu zawrh an tum laia 'Kohhran kan ráwn lo ang' titu leh zu zawrh lohna tura kohhran ṭawngṭai rualna pawh, amahah leh a chhungkuaah a rem lohna a awm loh vanga zu zawrh chu Pathianin a remti nia ngaia sawitu ngei kha MNF sorkarah cabinet minister a ni," a ti a; Congress sorkar laia zu zawrh phalna tur bill Assembly-a pu luttu chu zu-a a ngaihdan hmasa aṭanga a inthen thianghlimna an hriat loh thu a sawi.

ZPM Sr. Vice Chairman chuan, Assembly House-a zu zawrh theihna tur bill pu luttu chu MNF-ah a luh tak avanga zu nena inkaihhnawih lo, minister thianghlimah ngaih ngawt theih a ni lo tih a sawi a, "BJP-in India ramah mahni sakhua ṭheuh zalen tana kan biak theihna secularism nuaibo a, Hindu kalhmanga min kaltir vek an tumna Hindutva dona atan te, secularirm tun dinna tur leh, Mizoram leh hnam leh sakhua humhimna tura BJP lama ṭang lo tur MP candidate a tlin theih nana Congress mite vote khan zu rim a nam bikna tur a awm lo," a ti.