MPYCC-in sum lamah sorkarin Harsatna a tawh an hlauthawng

Congress party ṭha-laite chuan thuchhuah siamin, Congress sorkarin Mizoram sorkar sum tam tak a khâwl sa, ruahmanna mumal awm loa MNF sorkarin a hman pur pur avangin sum lamah harsatna sawi rîk a awm ṭan nghal dêr niin an tarlang a; sum lama harsatna naménlo Mizoramin a tawh an hlauhthawn thu an sawi.

Mizoram Pradesh Youth Congress Committee (MPYCC) chuan, "MNF sorkarin sorkar hmasa sum tam tak khawl sa, fapa tlanbo ang maia hisáp nei loa a tlakral leh honeymoon a hman rei vanga ni tin a tel loa kan awm theih loh, tui in tur leh electric êngah mipuiin harsatna kan tâwk ta hi pawi kan ti tak zet a ni," an ti.

Aizawl khawpui mai ni lo, Mizoram hmun hrang hrangah tui a harsa hle tih sawiin MPYCC chuan, "Mi tam tak tui harsatna avangin an buai mek. Congress sorkar laia tui sem hun inhrilh thlap thlap ṭhin ang kha hriat tur a awm tawh lo a, kan hriat ngai loh mi inphalte hnen aṭangin Aizawl veng ṭhenkhatah tui a thlawna sem a ngai hial a ni," an ti a; mipuite'n tui in turah harsatna an tâwk chu pawi an tih thu an sawi.

MPYCC chuan, MNF sorkarah kawlphetha a mumal lo nia sawiin, "Sorkar hmasaa êng awm loh tur thu inhriattir thlap thlap ang kha hriat tur a awm tawh lo. Rei tak tak, a chhan leh vang hriat lohin Aizawl khawpui leh Mizoram hmun hrang hrangah electric êng a thim ta reng mai a, kawlphetha hmanga eizawngte an mangang hle a, khaw tam takah harsatna a thleng mek a ni," an ti.