Mizoramah sikul awm lohna khua 15 a awm

Economics & Statistics department-in tun hnaia an tihchhuah thar, Village Profile & Development Indicators 2017-2018 Mizoram State-a a lan danin, Mizorama thingtlang khua 725 zinga khaw 304-ah Health sub-centre a awm a, khaw 710-in primary school an nei a, primary school awm lohna khua 15 a la awm.

Village Profile & Development Indicators 2017-2018 tarlan danin, khaw 725 zinga khaw 710-ah primary school a awm tawh a, chu chu 97.93% a tling a; P/S awm lohna khua 15 (2.07%) a la awm. Khaw 636-ah middle school a awm a, chu chu khaw 725 aṭangin 87.72% a ni a, khaw 323 (44.55%)-ah high school awmin, Mizorama khua zingah high school nei lo an la tam zawk. Higher secondary school chu khaw 54-ah a awm a, chu chu khua 725 aṭangin 7.45% chauh a ni a, khaw 671-ah HSS a la awm lo.

Mizoramah elementary school (primary leh middle) 2,261 a awm a, chu'ng zinga sikul 1,619 (71.6%) chuan tui in tur thianghlim naupangte tan an buatsaih thei. Elementary school 1,406 (62.3%)-ah naupangte tan inthiarna (common toilet) a awm a; high school 259-in zirlai mipa leh hmeichhia tan inthiarna hrang an nei bawk. 

Hetih lai hian, Mizorama khua 725 zinga khua 682-ah anganwadi centre a awm. Mizoram puma thingtlang khua 304-a Health sub-centre awm hi chhung­kaw 423-in sub-centre pakhat an inṭawm ang a ni a, mi 2,125-in sub-centre pakhat an inṭawm ang a ni bawk. Khaw 569-ah accredited social health activist (ASHA) an awm a, chu chu Mizorama khaw awm 725 aṭangin 78.5% a ni.

Livestock & veterinary lamah, survey neih laiin Mizoramah bawng 19,911, vawk 79,809, kêl 15,744, sial 4,224 leh mimal sangha dîl 7,799 a awm. Chutih laiin, thingtlang khua 725 zingah khaw 24 (3.31%)-ah chiah veterinary dispensary/clinic a awm a, khaw 60 (8.28%)-ah rural animal health centre a awm. Khaw 30-in veterinary dispensary pakhat an inṭâwm ang a ni a, khaw 12-in rural animal health centre pakhat an inṭâwm ang a ni.

Economics & Statistics-in survey an tih lai hian Mizorama thingtlang khua 725 zinga khaw 46 (6.23%)-ah bank a awm a, chawhrualin, khaw 14 velin bank pakhat an inṭâwm ang a ni. Bank awm lohna khuate'n an khua aṭanga bank awmna hnai ber khua hlat zawng chawhrual chu km. 29.31 a tling.

Khaw 725 zinga 609 (84%)-in an khuaah khelmual an nei a, khaw 427 (58.90%)-in community hall an nei. Khaw 289 (39.86%)-in sorkar pawmpui library an nei a, khaw 361 (49.79%)-ah cable TV a lut tawh. Khaw 46 (6.34%)-in internet connectivity (mobile phone internet tel loin) an nei a; khaw 219 (30.21%)-ah Mizoram pum huap ni tin chanchinbu a thleng a; khaw 670 (92.41%)-in thlânmual an nei a; khaw 78-ah cooperative society dawr a awm bawk.