MPCC-in TJ Lalnuntluanga dan an tum. 'Hma kan la zel dawn' - Congress party

Assembly House chhunga inhnialna avanga páwn lam thlenga minister of state TJ Lalnuntluanga’n INC member C Ngunlianchunga a ûm zui leh kutthlak a tum avangin nimin khan TJ Lalnuntluanga dan tumin Congress party mite Assembly House kawtah an pungkhawm a; dang thei lo mah se, hmalak chhunzawm zel an tum.

Congress party mite chu zing dar 9 vel aṭangin Assembly House tualah an pungkhawm a, TJ Lalnuntluanga session kal tur an lo châng. TJ Lalnuntluanga chu MPCC-te'n an chàn lohna lam aṭangin zing 9:20 velah Assembly House-ah a lut. A lut tawh tih an hriat loh avangin a motor dan an tum a, police-in an vèn avangin an dang thei lo.

Assembly House kawta Congress party mite kal khawm tur police-in an dan avangin hun rei vak lo innawr a ni a, buaina lian tham thleng loin chawhma dar 11:40 velah an ṭin darh a ni. Congress party hian TJ Lalnuntluanga chu March 16, Thawhlehni ral hma ngeia ngaihdam dil turin an phût a; TJ Lalnuntluanga chuan Thawhlehni zan khan C Ngunlianchunga hnenah ngaihdam dilna a thawn. Hetihlai hian Congress chuan House chhunga a chetdanah chuan TJ Lalnuntluanga hian ngaihdam a dil nia sawiin, House pawna a chetdana ngaihdam dil chu an phut ber a nih thu an sawi.

Thudawn danin, MNF MLA ṭhenkhat chu Thawhlehni zan khan C Ngunlianchunga inah léngin, TJ Lalnuntluanga ngaihdam an dilsak bakah, a ngaihdam dilna lehkha, a letterhead-a a ziah chu an pe a ni. Punkhawmnaah hian MPCC hruaitu MLA leh minister lo ni tawhte'n thu sawiin, "TJ Lalnuntluanga chu awmze nei lo leh tawngpawng dan tum an nih loh thu an sawi a, "Kan pi leh pu, kan nu leh pate hunlai aṭang tawhin hetianga House tihbawrhbanna a awm ngai lo. MLA junior leh kum lamah pawh naupang tak aia upa zahna pakhatmah nei loin a che hi kan dem," an ti.

C Ngunlianchunga chuan Mizo pa takin ngaihdam dilna a pawm thu sawiin MPCC hruaitute chuan, "Kan MLA chauh beihnaah kan ngai loa, a candidate tu party zah lohnaah kan ngai. Chuvangin, MLA-in ngaidam thei mah se, House pawna a chetdan avanga ngaihdam a dil hma chu kan ngaidam thei lo," an ti a, TJ Lalnuntluanga hian ngaihdam a dil loh chuan hma an lak zel tur thu an sawi.

MPCC hruaitute chuan Parlia­mentary Affairs Minister nih avanga House chhungah duh duha mi whip theih a nih loh thu sawiin, "Chief Whip awmzia hre lo Law Minister kan nei hi a van­duai­thlak hle. Chief Whip a nihna a chhuang a, Chief Whip a nihna hi Congress party leh party dang tan awmzia a awm lo," an ti.

Tun hma aṭangin House chhungah chuan inhnialin, kut inthlakna hialte pawh a thlen tawh thu sawiin MPCC hruaitute chuan, "Na tak takin kan inti a, kawngkhar aṭanga kan chhuah hnuah kan intizui ngai lo. MLA-te'n House chhunga an thusawi hi thubuai hla buaiah pawh lak chi a ni lo," an ti a, TJ Lalnuntluanga chuan senior MLA kum lamah pawh a pa rual House chhung leh pawn thlengin mawi lo taka a tihbuai thu an sawi.

MPCC hruaitute chuan House chhungah chuan na tak taka intih ṭhin a nih avangin TJ Lalnuntluanga chetdan an hriatthiam deuh thu sawiin, "Kan duh loh ber chu tun hma-a la thleng ngai lo House pawna incho leh ṭawngkam mawi lo taka in ṭawngkhum hi a ni. A ngaihdam dilna nia langah hian House chhunga a chetdanah chauh a ni a, kan duh ber chu House pawna a chetdan avanga ngaihdam dil a ni," an ti.

MPCC hruaitute chuan TJ Lalnuntluanga chu minister ni tlakah an ngaih loh thu sawiin, minister aṭanga bàn turin Chief Minister an phût. MPCC hruaitute chu nimin khan Congress Bhavan-ah an ṭhukhawm nghal a, hmalak zel dan tur an rél a ni. MPCC chuan thuchhuah siamin, TJ Lal­nuntluanga'n House chhunga a chêt danah chiah ngaihdam a dil tih an tarlang a, "Kan ngaihthiam loh ber, House páwn lama C Ngunlianchunga kutthlak a tum leh ṭawngkam mawi lo taka a beihnaah ngaihdam a dil tel duh lo a, ṭawngkam ngeia ngaihdam dilna a chhâk chhuak duh hek lo. Hetiang a nih avang hian Assembly House kawta lungawi lohna lantirna hi kaltlangpui a ni ta a ni," an ti.

Lai District Congress Committee pawhin thuchhuah siamin, Lawngtlai West bialtu MLA C Ngunlianchunga chunga a chet dan avangin TJ Lalnuntluanga chuan minister aṭanga bang tura an phut thu an tarlang.

TJ Lalnuntluanga ngaihdam dilna :
'Nimin ni 15.03.2021 (Thawhṭanni) Assembly Budget Session-a i thusawi laiin kan ngaihdan inan loh chungchangah leh thu kan inbah sual vangin ṭawngkam mawi lo deuh leh i rilru tina thei zawnga ka lo hman palh avangin pawi ka ti hle mai. I mi hriatthiamna ka rawn ngen e.

Nizanah mobile phone-a ngaihdam dil tura biak che tumin vawi eng emaw zat ka call che a, i lo remchan loh leh laklawh avangin i nupul Pi Chhingpui'in phone call a lo la a, thil awm dan leh ka thiam lohnaahte min hrethiam tur leh min ngaidam turin ka ngen nghe nghe a ni. Tin, zanah kan inbiak theih loh avangin tukin lamah biak tum chein vawi eng emaw zat ka rawn call leh che a, kan inbe pawp leh thei ta si lo a.

Chuvang chuan i rilru ka lo tihnatnaah min hrethiam tura, thupha ka rawn chawina hi min pawmsak turin ka ngen a che'.