PM hoin Covid-19 chungchang sawiho a ni

Prime minister Narendra Modi leh Home minister Amit Shah-te hoin nimin khan state hrang hranga Chief Minister leh union territory-a administrator-te'n video conferencing hmangin India rama Covid-19 dinhmun leh vaccine pek dan an thlirho.

He hunah hian Chief Minister aiawhin Health minister Dr R Lal­thangliana a tel a, Mizoram dinhmun leh vaccine mamawh belh thu a thlen a; hripui donaa Mizoram hlawhtlin dan leh a chhante a tarlang. PM Narendra Modi chuan, Covid vaccine pek leh inkhuahkhirhnate a ruala kalpui a nih thu sawiin, "Vaccination avangin mipui inthlahdah thei kan ni lo a, sorkarin inkaihhruaina a duante uluk taka zawm leh ngaih pawimawh reng a ṭul," a ti. 

Swab sample endik nan state ṭhenkhatin RAT an hman tam thu sawiin Narendra Modi chuan, "RT-PCR test tam thei ang ber tih hi duhthusam a ni," a ti a; district level-a hripui do nan micro containment zone ngaih pawimawh a ṭul thu te, vaccination centre tihpun a ṭul thu leh vaccine rîral a tam nia lang chu uluk taka vil leh en zui a pawimawh thu a sawi.

Meeting-ah an tarlan danin, India ram chu USA tih lohah chuan Covid vaccine pek tamna ber ram a ni a, mi 3,05,10,000 hnenah Covid-19 vaccine pek a ni tawh a, chu'ng zinga mi 1,03,80,000 chu kum upa lam leh natna benvawn neite an ni. India ramah swab test zat aṭanga positive case awm zat percentage chu 4.99 % a ni a, Mizoram chu 1.82 % a ni. Hripui vei tawh dam taka chhuak percentage (recovery rate) chu India ramah 96.54% a nih laiin, Mizoram chu 99.44% a ni a; Covid-19 vei thi (mortality rate) chu ram pumah 1.39 % a nih laiin, Mizoramah 0.22 % a ni.