Myanmar ram buaina avanga thite Sûnna hun Aizawlah hman a ni

MZP Gen.Hqrs leh United for Democratic Myanmar chuan February 16, Thawhlehni zan dar 7:30 khan Vanapa Hall kawtah Myanmar buaina avanga thite sûnna hun an hmang a, mi ṭhahnem tak an tel.

He hun hi MZP vice president Peter Chhangte-in a kaihruai a; MZP president B Vanlaltána chuan, Myanmar rama democracy tun din duha hma latute chunga nasa taka buaina leh harsatna a thleng leh mi eng emaw zat an thi chu an dem tak zet thu a sawi a, "Zanina he hmuna lusúnte tuarpuia sùnna hun hman a ngai ta hi lungchhiatthlak kan ti hle a ni," a ti.

MZP chu zirlai pawl ni mah se, hnam inphumkhatna turin theihtawp an chhuah ṭhin tih sawiin B Vanlaltana chuan, "Inunauna kan tih hi sawi mai ni lo, a taka kalpui turin Mizoram sorkar kan chah duh. Tunah hian inunauna a taka kan lantir a hun tawh tak zet a ni," a ti a; ram hrang hranga awm Zo hnahthlakte inhmangaihna lantir hun chu mangan, harsatna kan tawh hun a nih thu a sawi.

MZP President chuan, Mizo danah manganga lal sûtpui vuantute beidawnga chhuahtir anni ngai lo tih sawiin, "Kan unau manganga Mizoram lo lutte hi kan sorkar pawhin a ṭul anga a buaipui a hun tawh tak zet. Kan unaute kan ṭanpui thei lo a nih chuan Mizo inti tlak pawh kan ni lo ang. Myanmar kan unau manganga awm mekte'n an duh ber democracy tun din a nih theih nana an hmalakna hi a hlawhtlin a, buaina leh harsatna lak aṭanga an him nan vawi khat tal ṭawngṭai turin Mizo mipui kan sáwm a ni," a ti.

Myanmar buaina vanga thite sûnna chu MZP general secretary Lalnunmawia Pautu-in a kaihruai a,  kalkhawmte'n bati chhíin minute khat chhung ngawi rengin an ding a ni.