TJ Lalnuntluanga demand sawinaah Congress MLA-te an tel ve duh lo
Nimina Assembly session-ah Congress Legislature Party (CLP) member-te chu CLP deputy leader C Ngunlianchunga chunga a chêt dan avangin minister of state TJ Lalnuntluanga demand sawihonaah an tel duh lo.
Nimin kha House-ah chief minister Zoramthanga leh TJ Lalnuntluanga te department chan demand sawiho ní a ni. CLP member-te chu demand sawiho ṭan dawnah House chhungah lutin, an leader Zodintluanga Ralte chuan, C Ngunlianchunga lakah House chhung leh páwnah TJ Lalnuntluanga mawi lo taka a chêt avangin a demand sawihonaah an tel ve theih loh thu Speaker a hrilh a; House an chhuahsan nghal a ni.
Nimin kha House-ah chief minister Zoramthanga leh TJ Lalnuntluanga te department chan demand sawiho ní a ni. CLP member-te chu demand sawiho ṭan dawnah House chhungah lutin, an leader Zodintluanga Ralte chuan, C Ngunlianchunga lakah House chhung leh páwnah TJ Lalnuntluanga mawi lo taka a chêt avangin a demand sawihonaah an tel ve theih loh thu Speaker a hrilh a; House an chhuahsan nghal a ni.
Thuthar thehdarhtute zawhna chhangin Zodintluanga chuan, loh theih lohna vangin demand sawipui loa an chhuah a ngaih thu a sawi a, "Pawi kan ti a, ti lo thei lo kan ni si. Hman aṭangin state dangte pawhin kan House hi entawntlak an ti ṭhin. Governor rawn awmte pawhin a zahawmzia an sawi ṭhin a ni," a ti.
CLP Leader chuan, MNF sorkar apiangin ram rorelnaah buaina a awm ṭhin tih sawiin, "An term hmasaah House chhunga kut inthlak a thleng. House chhungah chuan thinrim tak takte pawhin kan inhnial a, mahse, House chhung a pèl ngai lo," a ti a; House páwnah boruak ṭha lo a thlen zui ngai loh thu a sawi.
Zodintluanga Ralte chuan, TJ Lalnuntluanga chêt dan avanga an lungawi lohna CLP hmingin Speaker hnenah a thlen tih sawiin, "Kan kal zel dan tur chu party thu thu a ni," a ti. CLP secretary KT Rokhaw chuan, ṭum eng emaw zat MLA a nih ve tawh thu sawiin, "Senior MLA-te kan zah ṭhin hle," a ti a; TJ Lalnuntluanga'n senior MLA-te zahna a nei miah lo chu pawi a tih thu a sawi.
Assembly House tuala CCTV footage delete anga sawi awm chungchangah CLP member Lalrindika Ralte chuan, "CCTV footage hi delete a nih tak tak chuan a dik lo hulhualah ka ngai. Thu dik pawh hâi lang ngam lo khawpa hma latu an awm a nih chuan ram leh hnam tan a pawi. Thu dik lan chhuahna tur document tihchhiat a nih chuan a dik lo ngawt ang," a ti.