Sum neih dan tur hriat loh avangin Youth Commission-in hma thar la lo
Mizoram Youth Commission (MYC) chuan sorkar inthlak hnuah an sum neih dan tur an la hriat loh avangin hma thar an la chhunzawm lo a, an hmalakna ṭhenkhat chawlhsan mai remchang rih lote erawh an la kalpui zel.
Vanglaini palai thu dawn danin, sorkar kum kal mek (2019-2020) atan MYC hian an sum neih dan tur an la hre lo a, chu vang chuan hma thar an la chhunzawm thei rih lo. Hetih lai hian, MYC hmalakna hnuaiah thil chi hrang hrang training kalpui a ni a, chu'ngah chuan zirlaite'n sum an thawh ve ṭhin a, chungte chu chhunzawm a ni.
MNF-in sorkarna an siam hnuah MYC chairman thar tur ruat a la ni lo a, thil ṭul leh pawimawh hrang hrangah chuan MYC nodal department - Labour, Employment, Skill Development and Entrepreneurship department changtu minister leh secretary hnenah thlenin, an pawmpuina lak ṭhin a ni.
MYC-ah hian thawktu muster roll leh contract hmanga lak mi eng emaw zat an awm a, chu'ngte chu an awm chhunzawm zel dan tur hriat a la ni lo. MR leh contract-a lakte chu an term a la tawp lo a, a tawp huna rawih chhunzawm an nih dawn leh dawn loah chuan sorkarin thutlukna a la siam ang. Hetih lai hian, MYC-a hna sang lam thawkte chu department dang aṭanga attach-a dah an ni thung.
MYC tan hian sum dah zat tur leh kalpui chhunzawm zel dan tur hriat la ni lo mah se, thawktute hlawh tur chu sorkarin a ruahmansak a ni. Ṭhalai chawimawi tlâkte chawimawi nan leh Mizo ṭhalai dangte cho phûrna atana ṭhalai kum 40 hnuai lam hnena MYC-in Young Achievers Award a hlan chu kalpui chhunzawm zel a nih dawn leh dawn lohah thutlukna siam a la ni lo. An sum neih dan tur an la hriat loh avangin MYC-a thawktute chuan Young Achievers Award an buaipui rih lo.
MYC hian September 21, 2018 khan Pachhunga University College (PUC) Auditorium-ah Young Achievers Award an sem a, ṭhalai mi pariat hnenah award an hlan. Young Achievers Award dawngtute hnenah hian lawmpuina thuchei leh Rs. 1,00,000 hlan a ni thin.
Hetih lai hian, MYC hian sum leh pai nei lo mah se, hmeichhe sipai lak turah Mizo tam zawk an luh theihna atan ruahmanna siam an tum. Tunlai hian Aizawla Assam Rifles hotute nen inbiain, anni nena ṭangkawpa sipaia ṭang duh hmeichhiate tana lo inbuatsaih lâwkna tur siam an tum a ni.
Hetih lai hian, MYC hian sum leh pai nei lo mah se, hmeichhe sipai lak turah Mizo tam zawk an luh theihna atan ruahmanna siam an tum. Tunlai hian Aizawla Assam Rifles hotute nen inbiain, anni nena ṭangkawpa sipaia ṭang duh hmeichhiate tana lo inbuatsaih lâwkna tur siam an tum a ni.
MYC din tur hian Mizoram Youth Commission Bill, 2008 chu Mizoram Legislative Assembly-ah April 2, 2008-ah pass a ni a, April 4, 2008-ah Mizoram Governor-in a pawm a ni.