Edu Options IPR Director-in a hawng

Lynchpin leh Zalen chanchinbu chuan nimin khan Dawrpui Multipurpose Centre-ah ni hnih awh Edu Options 2019 an buatsaih a, Information & Public Relations (IPR) director David L Thangliana'n a hawng.

David L Thangliana chuan, zirlaite an zir zelna tur kawmhmuhna hun remchang buatsaih chu a pawimawh tih sawiin, "Kan ṭhalaite sorkar hna thawh tum ringawta vir buai ngai loin, option dang eng nge awm tih te, eng lama kal tur nge tihte Edu Options hian a kawhhmuh dawn a ni. Zirlaite zingah mahni tuina leh an kalna tur line hre loa kal mai mai an tam hle a ni," a ti.

IPR Director chuan, Edu Options chu ṭhalaite leh nu leh pate'n a pawimawhna hriain, mithiam zawkte'n free counselling an pek ṭhin chu hlut zual se a duh thu a sawi. Zalen editor Vanlalrema Vantawl chuan, Edu Options chu zirlaite tan hmanraw ṭangkai tak a ni tawh ṭhin tih a sawi a, "Edu Options kaltlang hian ṭhalaite'n zirna ṭha zawk an nei a, hna ṭha tak tak pawh tam takin an hmuh phah tih kan hriatin kan lawm hle. Kuminah pawh zirlai leh nu leh pate'n rawn chhawr ṭangkai sela kan duh hle a ni," a ti.

Tum ṭum Edu Options hi a vawi 17-na a ni a, India ram hmun hrang hrang aṭangin institution 22 an tel. Institution 22-ah hian stream leh line thlan tur 200 chuang a awm a, kum danga awm tel ngai lo post graduate course-te pawh a tel a ni. Fingerprint hmanga zirlaite kalna lam tur leh an theihna leh thiam bikna hriat theihna Dermatoglyphics Multiple Intelligence Test (DMIT) lakna a awm bawk.