HSSLC 2019-ah zirlai 8,380 an pass

Mizoram Board of School Education (MBSE) chuan, Higher Secondary School Leaving Certificate (HSSLC) Examination 2019 result chu nimin chawhma dar 11:30 khan an tichhuak a, zirlai exam 10,616 zinga 8,380 an pass. Pass percentage chu 78.94 a ni a, nikum 2018-a pass percentage 80.49 aia a hniam zawk laiin, kum 2017-a pass percentage 72.17 aiin a sang zawk.

Arts-ah C Lalvenhimi d/o C Chawnghmingthanga, Rev. Saiaithanga Memorial HSS, Aizawl pakhatna a ni a, top 10-ah zirlai 11 an awm. Science-ah Lalrintluanga Tlau s/o Vanlalhriata leh Akash Jyoti Sahoo s/o Uttam Kumar Sahoo, St. Paul's HSS ve vete pakhatna an ni a, top 10-ah zirlai 11 an lang. Commerce-ah chuan C Lalnunhlimi d/o C Vanlalmuana, Oikos HSS, Aizawl pakhatna a ni.

Kumin HSSLC Examination-ah hian exam hmachhawntu zirlai 10,616 awmin, regular student 10,434 leh private-a exam mi 182 an ni a; pass zawng zawng zirlai 8,380 zinga a tam zawk 4,459 chu hmeichhia niin, mi 3,921 chu mipa an ni. Regular-a exam zingah 8,312 (79.66%) pass in, private candidate 182 zinga 68 (37.35%) an pass.

Zirlai pass 8,380 zinga 567 chu distinction-ah an pass a, nikuma distinction-a pass 455 aiin 115-in an tam zawk. First division-ah 2,800, second division-ah 3,289 leh third division-ah 1,724 an pass. Compartmental chance nei zirlai 206 an awm a, zirlai 2,030 an fail. Zirlai exam pass vekna sikul Arts-ah 37, Science-ah pathum leh Commerce-ah pathum a awm a, zirlai exam-te fail vekna sikul pathum (Arts vek) a awm bawk.

Compartmental chance neite tan MBSE chuan June 6, 2019-ah Aizawl leh district khawpui tina centre pakhat ṭheuhah exam a buatsaih dawn a, May 24 thleng MBSE-ah exam form thehluh theih a ni. Arts bikah zirlai exam 7,990 zinga 6,147 (76.93%) an pass a, mi 1,674 an fail a; kum 2018-a pass percentage chu 79.21 a ni. Distinction-ah mi 352, first division-ah 1,752, second division-ah 2,467 leh third division-ah 1,576 pass-in, compartment chance nei mi 169 an awm.

Science-ah zirlai exam 2,119 zinga 1,777 (83.86%) an pass a, zirlai 308 an fail a; nikumah 86.98% an pass. Distinction-ah mi 164 an pass (nikumah 95) a, first division-ah 897, second division-ah 634, third division-ah 82 pass in, compartment chance nei mi 34 an awm a ni.

Commerce-ah zirlai 507 zinga 456 (89.94%) an pass a (nikumah 91.88%), zirlai 48 fail in, compartmental chance nei zirlai pathum an awm. Distinction-ah mi 51, first division-ah 151, second division-ah 188 leh third division-ah 66 an pass. Arts stream-ah hian sorkar sikulah 72.17% (nikumah 76.40%), deficit school-ah 93.27% (nikumah 93.54%0, aided school-ah 81.42% (nikumah 89.08%), lumpsum school-ah 84.93% (nikumah 90.76%) leh private school-ah 77.58% (nikumah 77.85%) an pass a; private candidate zingah 35.76% (nikumah 47.13%) an pass a ni.

Science-ah chuan sorkar sikulah 72.29% (nikumah 73.62%), deficit school-ah 92.15% (nikumah 95.04%), aided school-ah 90.91% (nikumah 92.86%) leh private school-ah 85.49% (nikumah 90.26%) an pass a; private candidate zingah 52.94% (nikumah 50%) an pass. Commerce-ah chuan sorkar sikulah 81.38% (nikumah 88.14%), deficit school-ah 90.24% (nikumah 96.72%) leh private school-ah 95.96% (nikumah 91.10%) an pass bawk.