Quality-ah hma kan sâwn - MBSE Chairman

Mizoram Board of School Education (MBSE) chairman F Lianhmingthanga chuan, Higher Secondary School Leaving Certificate (HSSLC) Examinations 2019 result nimina tihchhuah tak chuan nikum lama pass percentage pha lo mah se, kuminah division sang lama pass an an tam zawk thu a sawi a, "Quality lamah hma kan sawn a ni," a ti.

HSSLC 2019 result chhuah hnua thuthar theh-darhtute'n an kawmnaah F Lianhmingthanga chuan, "Pass percentage hi stream tinah 2% velin kum hmasa aiin hniam mah se, thil lawmawm a awm a, chu chu quality lamah hma kan sawn hi a ni. Nikum aiin kan hniam hret a, hei hi chu kalphung ve reng a ni a, a changin tlemin a hniam hret a, a changin a sang hret bawk ṭhin," a ti a; Arts-ah nikum aiin kuminah distinction-a pass 61-in an tam zawk a, Science-ah 69-in an tam zawk bawk tih a sawi.

F Lianhmingthanga chuan division sanga pass zat kum hmasa aia a tam zawk chhan zawhna chhangin, "Syllabus-te kan lo hmang rei ve tawh a, zirtirtute pawhin an bel tlangpui tawh a, naupangte pawhin hma an sawn veah kan ngai mai," a ti. Internal mark an tih mai, Integrated Evaluation Scheme (IES)-in result-ah nghawng a neih leh neih loh zawhna chhangin F Lianhmingthanga chuan, "Kumin hi IES vawi hnih kan hmanna a ni a, tlem tlem chuan result a tisang ve hret ang chu," a ti a; internal-in mark 20 leh external (board exam)-in mark 80 a put thu leh, IES chu zirtirtute'n an hmang thiam tawh viaua an hriat thu a sawi.

MBSE Chairman chuan, IES-a mark pek danah mahni sikul zirlaite duhsak bik taka mark pek a awm leh awm loh zawhna chhangin, "Sikul pahnih/khat vel chu rinhlelhawm, tlema kan mi tikham deuh an awm a, a ti ṭha fâl, subject zawng zawnga full mark han pekna ang chi deuhte a awm. Chungte chu kan han endik a, siam rem ngai tlem tlem chu a awm ve. Chuti tih lohah chuan Mizote hi kan rinawm khawpin kan hria, an ti ṭha khawp mai," a ti.