Sorkarin zirna a thuam ṭha dawn - Education Minister

School Education minister Lalchhandama Ralte chuan nimin khan Durtlang Teachers' Association-in Durtlang Higher Secondary School-a General Meeting an neih a hmanpui a, thu sawiin, sorkarin zirna a thuam ṭha dawn tih a sawi.

Lalchhandama Ralte chuan, sorkarin zirna a ngaih pawimawh thu sawiin, "Zirna hi a thuam ṭha dawn a, a thîkthu pawh a chhia ang. Kumina sorkar sikul HSLC result-a nil-te chu explanation call nghal turin ka hriattir a, sikul tichhe rei tawhte phei chu an sikul khâr a nih loh chhan tur zawt turin ka hriattir a ni," a ti.

Education Minister chuan, sorkar sikulah a thlawnin admission a tih theih a, uniform leh textbook te, mid-day meal-te a thlawn veka pek a nih thu sawiin, "Zirtirtu pawh qualify, ṭha tak tak kan nei a, facility pawh a theih ang ang kan inpe a ni. Tun dinhmunah chuan hlawh pawh ba loin kan inpe. Chuti chung chuan naupangin private school an pan zawk tlat si a ni," a ti a; zirtirtute chu inenfiah se a duh thu a sawi.

Mizoram chu economy-ah a sang lo chungin nu leh pate chu zirnaah an rualawt a, nei leh nei loin an inséngso ngam tih sawiin Lalchhandama chuan, "Sorkar chuan naupangin zirna ṭha an dawn theih nan an mamawh kan chhawp chhuak tur a ni a, duhthusam ni lo mah se, a theih ang angin sikul mamawh kan pe a, chuti chung chuan engati nge naupang kan neih tlem?" a ti.

School Education Minister chuan, aikal la, hrisel lohna vang te, khawtlang pawhin hriatthiam loh theih lohte an awm laiin, dam ṭha si, mahni hnathawhna hmunah pawh awm ṭha lo, sumdawng ta daihte an awm tih sawiin, "Tláwm tê têa aikal, training nei mang hlei lo chhawr an tam a ni," a ti a; a theih chin chinah aikal lâk chu khauh taka enfel a nih dawn thu a sawi.

Durtlang Teachers Association General Meeting-ah hian Durtlang huam chhunga sikul hrang hrang - primary school aṭanga higher secondary school zirtirtute an tel a ni.