Ni tin mamawh tihchingpen titawp turin Essential Commodities Protection Squad din

Kolasib district chhunga mipui ni tin mamawh - petrol, diesel, khawnvartui, buhfai leh eirawngbawlna gas khawih chingpen ṭhin tihtawp dan tur ngaihtuahin nimin khan Kolasib DC Zoengsanga hoin a pisaah sorkar official, Kolasib Sub-Headquarters YMA leh Kolasib District MJA hruaitute an ṭhukhawm a; hma latu tur Essential Commodities Protection Squad an din.

Kolasib DC chuan, NH-54 kaltlanga Assam aṭanga Mizorama lut mipui ni tin mamawh khawih chingpen a ni ṭhin chu thil ṭha lo tak leh veiawm tak a nih thu a sawi a, "Mipui chanvo ei rûkna chi khat a ni. Kan district chhunga khawih ching­pen a nih hian Mizoram puma mipuite'n an tuar vek a, petrol, diesel, khawnvartui, buhfai leh gas khawih chingpen ṭhin hi titawp tura khawtlang hruaitute nen thawhho a ṭul," a ti.

Zoengsanga chuan, Assam aṭanga Mizoramin eirawngbawlna gas leh tuialhthei a châwk luhte chu kawng lakah tihchinpen a ni ṭhin tih sawiin, "Thuneitu sang zawk aṭangin Kolasib district chhung NH-54 kawng dungah tihchinpennna hmun pariat a awm thu hriattirna kan dawng a ni," a ti a; Mizoram mipuiin gas bûk tling leh oil pawlh dal loh an dawn theih nan gas leh tuialh­thei tihchinpen awm ṭhinte tihtawp dan tur leh tihchinpenna hmun zawn chhuah a ṭul thu a sawi.

Meeting-ah hian dan bawhchhiatna tihtawp a nih theih nan Kolasib SP kaihhruai Essential Commodities Protection Squad an din a, SDO (Sadar), Additional SP, IPRO, Legal Metrology Inspector, YMA Sub-Headquarters aiawh mi pahnih leh Kolasib MJA President-te member-ah ruat an ni.

Essential Commodities Protection Squad thawhpui tur hian sub-division level-ah Kawnpui, Vairengte leh Serluiah Police Squad din a ni a, member-ah group YMA hruaitute telh an ni bawk.