Sum dinhmun a ṭhat loh vangin Ways & means ṭum khat hmang

Mizoram sorkar chuan sum dinhmun a ṭhat tâwk loh avangin kumin chhungin Reserve Bank of India (RBI) aṭangin ways & means advances hmangin ṭum khat pawisa a pûk.

Finance department hotute hnen aṭanga Vanglaini thu dawn danin, Mizoram sorkar account-a sum awm zat tur cheng nuai 20 chu ṭum khat a awm tlin loh avangin RBI aṭangin Mizoram sorkar chuan ways & means hmangin sum a pûk a, mahse, a tûkah rulh leh nghal a ni.

Sum dinhmun a ṭhat loh chuan, state sorkarin ways & means hmangin RBI-ah sum an pûk thei a, account-a awm tur zat a awm loh chuan RBI-in direct-in way & means a hmang ṭhin bawk tih Finance department hotute chuan an sawi. Ways & means hmanga sum pûk chu a pung awma rulh tur a ni a, rulh hun tur bituk siam a ni. Hun tiam chhunga rulh a nih loh chuan overdraft (treasury khâr) thlengin sorkarin harsatna a tâwk thei a ni.

Zawhna chhangin Finance department hotute chuan, ways & means hman a ngaih chhan chu, sorkar laipuiin sum an pek har vang a nih thu an sawi a, "Model Code of Conduct avangin Election Commission of India thu lo chuan pawisa an release duh lo reng a ni. Tunah chuan kan sum dinhmunin ziaawm lam a pan zel a, a ṭha thawkhat tawh," an ti.

May 14, 2019 thleng khan RBI-a Mizoram sorkar account-ah cheng nuai 375 a awm a, May 20, 2019 khian sorkar laipuiin cheng vbc. 120 vel a rawn pek leh beisei a ni. General Provident Fund (GPF) chungchanga zawhna chhangin Finance dept. hotute chuan, "GPF hi a pangngai angin kan pe chhuak reng. Mah se, central aṭanga hun engemawchen sum kan hmuh ṭhat loh avangin kan department-a pek chhuah lo phalsak thei chin erawh, fimkhur thu hlaah kan ti danglam," an ti.