Code of Conduct bawhchhiaah NSUI-in Mizoram sorkar an puh

Mizoram sorkarin Election Model Code of Conduct bawhchhiain Tuikhuahtlang MNF unit-te hna an thawhtir nia an hriat avangin National Students' Union of India (NSUI), Mizoram chuan nimin khan Mizoram Chief Electoral Officer hnenah complaint an thehlut.

NSUI chuan, chief minister Zoramthanga enkawl department - PWD Building Division, Aizawl kaltlangin Tuikhuahtlang MNF unit-te chu Mizoram sorkarin Mizoram Legislature Home Renovation Work, cheng nuai 56 man a thawhtir ngeia an hriat thu leh, chu chu Model Code of Conduct bawhchhiatna a nih thu an tarlang.

Model Code of Conduct hman laia work order tihchhuah a ni chu pawi an tih thu sawiin NSUI chuan, "Kan ram hotupa ber, a cabinet minister-te pawhin an entawn tur zawkin a thu neihna hmang sual a, Election Commission phalna la loa Conduct Rules bawhchhiaa party mi leh sa duhsak luata hna a thawhtir hi a pawi kan ti. Dan anga a ṭul anga a chunga action la turin Election Commission chu kan ngen a ni," an ti.

NSUI, Mizoram complaint lehkha hi CEO Ashish Kundra a awm loh avangin a personal assistant hnenah pek a ni.