MJA Public Library building hawng

Aizawl Press Club-a MJA Public Library building sak thar chu nimin khan MJA president Zonunsanga Khiangte-in a hawng a, library chu Mizo mipuite'n hmang ṭangkai se a duh thu a sawi.

Library hawnna inkhawm hi MJA Library Sub-Committee vice chairman A Zotinkhuma'n a kaihruai a; MJA President chuan, mobile phone khawih nasat lutukin hriatna a tipawnláwi zoa a hriat thu sawiin, "Lehkhabu chhiar kan hlamchhiah tawh hle. Mi tinin lehkhabu chhiar kan uar leh hi MJA Library thil tum a ni a, hmasawn chu a har khawp mai. Beidawng loa beih zel a ngai," a ti.

Zonunsanga Khiangte chuan, document pawi­mawh tak tak, research titute tana ṭangkai tur tam tak MJA Public Library-ah a awm tih sawiin, "Research titute pawhin an rawn hman ṭangkai kan beisei. Miin hlâwkpuina atana an rawn hman chuan tute pawh ni se, kan hlawhtlinnaah kan ngai a ni," a ti a; lehkhabu tinah finna leh hlawhtlinna chhar tur a awm thu a sawi.

Inkhawmah hian Mizoram Library Asso-ciation vice president Lalramliana leh Mizoram State Library-a librarian Zirsangzuali te pawhin thu an sawi. MJA Library Sub-Committee secretary PB Lalrammawia tarlan danin, MJA Public Library building hi kum 2001-ah kha tih laia Lok Sabha MP Vanlalzawma'n a MP fund a pek Rs. 3,00,000 hmanga sak ṭan a ni a, March 13, 2002-ah sak zawh a ni. Building chu a hlui tawh avangin Aizawl Municipal Corporation sum pek hmanga building thar sak bul ṭanin, Rajya Sabha MP Ronald Sapa Tlau fund nen ṭangkawpa sak zawh a ni a; July 2018-ah building thar chu luah a ni.

Tun dinhmunah MJA Public Library-ah hian lehkhabu 5,416 a awm a, lehkhabu tam zawk chu mimal, pawl, kohhran leh sorkar department aṭanga dawn khawm a ni. MJA Library-ah hian a duh apiang tan member a nih theih reng a ni.