MRB-in uar zawka dâwr turin mipui an sáwm

Mizoram Rural Bank (MRB) chairman V Jaya Chandra chuan nimin khan MRB pisapuiah thuthar thehdarhtute a kâwm a; MRB chu Mizo mipuite ta a nih thu sawiin, tun aia uar zawka dàwr turin mipui a sáwm. V Jaya Chandra chuan, sorkar kum liam ta kha an tan kum ṭha nih thu sawiin, "Kan sumdawnnaah bank dang aiin hma kan sawn zawk a, Mizo mipui chungah kan lawm hle. Mizorama bank awm zingah branch ngah ber kan ni a, a darh zau lamah bank zawng zawng aṭanga chhûtin 41% kan ni. Chutih laiin, bank zawng zawnga sum deposit aṭanga chhûtin MRB-ah 21% deposit a ni," a ti.

MRB Chairman chuan, MRB chu Mizoramah bak an awm loh avangin Mizo mipui tan an ṭangkai hle tih sawiin, "Kan sum hmuh khawmte hi Mizoram atan bak a hman theih loh a, MRB-a sum lut leh chhuak hi Mizoram chhungah chauh a che vel a ni," a ti a; sorkar kum kal mekah hian branch 5-10 vel leh Lungleiah chhim lam enkawltu tur regional office hawn an tum thu a sawi.

MRB hotute sawi danin, MRB hian scheme thar, Community Hall Scheme an nei a, chu scheme hnuaiah chuan kohhran leh tlawmngai pawlte'n biak-in leh community hall sakna atan cheng nuai 10 aṭanga nuai 200 inkar an pûk thei a ni. Kum 2018-19 chhungin MRB-in sum sum hmuh (deposit) zat chu cheng vbc. 2,595.05 a ni a, loan atana pek chhuah (advances) chu cheng vbc. 1231.02 a tling a, credit deposit (CD) ratio chu 47.44% a ni.

MRB hian nimin khan HSLC Examinations 2019-a pakhatna aṭanga pathumnate leh subject zawng zawnga letter hmu Given Lawmnakima Ṭhiek, Bilkhaw­thlir hnenah lawmpuina an pe. Topper hnenah laptop leh Rs. 20,000 an pe a, mi dangte chu laptop leh Rs. 10,000 an pe a ni. MRB hotute chuan, Given Lawmnakima chu dinhmun harsa tak aṭanga hlawhtlinna a chan vanga lawmpuina pe an nih thu a sawi.