Serkhan-Bagha kawng sawiho

Nimin khan Kolasib DC Zoengsanga hoin a pisaah Serkhan leh Bagha inkar kawngpui siam mek sawiho a ni. Bawrhsap chuan, hna thawktu ABCI-te chu rinawm taka hna thawk turin a chah.

Kolasib Bawrhsap chuan, ABCI-te chu lung ṭha tâwk lo an hmante lung ṭhaa thlak turin a hrilh a, "Kumin fûrpui thlen hmain hna thawh zawh hman tum ang che u. Kan district-a hmasawnna ruhrel din leh siam kawnga hmalakna reng reng chuan belhchian a dâwl tur a ni. Hnathawh a ṭhat loh chuan mipuiin an tuar ṭhin a, chu chuan kawng tam takah state hmasawnna a tiṭhuanawp ṭhin," a ti.

Kawng siamin a huam chhunga khawtlang hruaitute chuan, Serkhan-Bagha kawng chu hmun ṭhenkhatah duhkhawp lohna lai an nei tih sawiin, "Lung ṭha tâwk lo hman a ni a, kawng siam a tlo lo hle," a ti a; kawng siam tlo lo chuan Serkhan leh Bagha inkara cheng mipui tan harsatna tam tak a thlen thu an sawi.

Serkhan-Bagha kawng siam mek hi km. 90 vela thui a ni a, km. 1-73 chu ABCI company-in an siam a, km. 74-90 inkar chu ABCI hnuaia company dang GP Project-in an siam thung.