MJA tan free clinic buatsaih

Kolsib District Hospital chuan Mizoram Journalist Association (MJA), Kolasib District member-te tan nimin khan Free Health Clinic an buatsaih. He hunah hian Kolasib MJA member-te chu doctor-te'n test chi hrang hrang hmangin lung (heart), chuap, thin, kal (kidney), mît, zunkawng leh thil dangte an enfiahsak a, a thlawnin damdawi eng emaw zat an pe.

Free Health Clinic ṭan hmain DMS Conference Hall-ah a hawnna inkhawm neih a ni a; medical officer Dr Lalnunhlua chuan, hriselna lama thawktute leh mipui hnena chanchin puangzar ṭhintu chanchinbumite chuan thawhhona ṭha tak an neih a pawimawh thu sawiin, Kola­sib-a media mite nen thawhhona ṭha an neih mek chu an chhunzawm zel a beisei thu a sawi.

Kolasib MJA president R Lalhmingthanga chuan, chanchinbumite chu an hnathawh dan phung avangin ei leh in hun bi mumal nei lo, taksa insawizawina hun pawh nei mumal lo an nih thu sawiin, chung chu an hriselna pawhin a tawrh ṭhin thu a sawi a; "Kolasib damdawi-in hotute leh thawktute'n MJA member-te tana a thlawna inentirna an buatsaih hi kan lawm hle," a ti.