MNF-in sorkar hmalakna lawmawm an ti

MNF party chuan nimin khan Vanapa Hall-ah National Executive Committee (NEC) meeting an nei a, MNF president Zoramthanga'n a kaihruai. Resolution pass in, MNF kaihhruai Mizoram sorkarin hma a lakna leh hna a thawh tawhte chu lawmawm an tih thu leh, Zoramthanga kaihhruai sorkar an rin tâwk thu an tarlang.

MNF NEC meeting chuan, MNF sorkar din tura Mizoram mipui, MNF vote-tu zawng zawng chungah lawmthu an sawi a, "CM Pu Zoramthanga leh a kaihhruai sorkara minister te, MLA te, board chairman-te leh committee péng hrang hrangte hmalak tawhna enin, an rintlakin an chhuanawm kan ti a, Mizoram kaihruai zel tur hian kan ring tâwk a ni," an ti.

Meeting resolution chuan, MNF sorkarin thla thum âwrh chhungin Mizoram tana hmasawnna hrang hrang a thlen nia tarlangin, "Zu a khap nghal te, district thar pathum siam nghal a ni te, khawpui laili aṭanga Assam Rifle sawn chhuah a nih theihna tur tihfel a ni te, kawng siam ṭhat a ni te, lirthei chhiah pek dan tih danglam a nite hi ropui kan ti tak zet a ni," an ti a; hun rei lo te chhunga MNF sorkar hnathawh chu chhuanawm an tih thu a tarlang.

MNF resolution chuan, fall armyworm-in Mizorama vaimim nasa taka a suat chu pawi an tih thu a tarlang a, "Hemi do let tura Agriculture department-in minister hoa hma an lakna hi a lawmawm kan ti a, sorkarin phungbawma a sâwm Central YMA-in sorkar nen thawkhoa hmalakna a kalpui hi a lawmawm kan ti tak zet a ni," a ti.