Hnam dang kum tling lo mi 14 Mizorama phur luttu hre tawh

Mizoram police-te leh YMA hruaitute ṭangkawpin May 5, 2019 tlaia Edenthar Veng, Aizawla Denghliri te ina hnam dang kum tling lo nia hriat hmeichhe pariat leh mipa pali an hmuh chhuahte phurhna lirthei khalhtute chu police-te'n an hre tawh.

Vanglaini palai zawhna chhangin Mizoram police hotute chuan, hnam dang mi 14-te Silchar aṭanga Durtlang leh Durtlang aṭanga Edenthar Venga phurtute an hriat tawh thu sawiin, "Anni hi chu an inhnamhnawih a rinawm loh. Passenger phur lirthei pangngai khalhtu an ni a, man chawiin an lirtheite an hmansak mai a nih hmel. Kan duh huna thu zawhfiah tura koh theih tura awm turin kan hrilh a, kan man lo," an ti.

Police hotute sawi danin, hnam dang khalh lirthei pakhat chuan mi 14-te chu Silchar aṭangin Durtlang thleng a phur a, Durtlang aṭangin Mizo khalh lirthei hmangin Edenthar Vengah hruai an ni. Lirthei khalhtute chuan, an lirtheite chu man chawi hmansak an nih thu leh mi 14-te chu khawia kal zui zel tur nge an nih an hriat loh thu an sawi.

Home leh centre-a dah mek hnam dang 14-te chu an awmna hmuna thawn kîr tura hmalak mek a nih thu sawiin Police hotute chuan, "Foreigner an nih avangin thawn kîr turin thil tih ngai a tam hle a, kan buaipui mek a ni," an ti. Police hotute chuan, mi 14 chungchanga thubuai chu chhui zui zel a ni tih sawiin, "Mi 14-te hmuh an nihnain neitu Denghliri betu ber Madiki bakah, Myanmar aṭanga mobile phone hmanga Mizo rawn be ṭhin pawh kan hre tawh a, kan chhui zui mek a ni," an ti a; he thil kaihhnawihah hian Mizoram mi chu thûk taka an inrawlh an rin loh thu an sawi.

Tarlan tawh angin, mi 14-te hi Myanmar-a Rakhine state aṭanga raltlan, Bangladesh refugee camp-a awm Rohingya Muslim an nih rin a ni a, an awmna hmun aṭangin bum chhuah an ni.