Hotel regulation chungchang sawiho

Lunglei DC K Lalrinzuali hoin a pisaah nimin khan Lung­lei khawpui chhunga hotel neitute leh sorkar enkawl mikhual thlenna (lodge) enkawltute'n hotel regulation leh registration chungchang an sawiho. 

K Lalrinzuali chuan, Lunglei khawpui then thianghlim nan hotel neitu leh sorkar lodge-te'n an mikhual neihte dinhmun hriat nan identity card, Aadhaar card, ILP lam te, foreiner an nih chuan passport leh visa an nei em tih felfai taka chhinchhiahna neih a ngaih thu a sawi a, "Registration felfai taka vawn hian mihring hmanga sumdawnna chhuina kawngah thui tak min pui thei dawn a ni," a ti.

Lunglei SP C Lalthanmawia chuan, "Mizoram hi ram rálmuang kan ti a, chumi remchanga hmang chuan mite'n suahsual rawng an lo báwl thei a ni tih hriain, Lunglei khawpui hi vawn thianghlim a ngai a ni," a ti a; Lunglei khawpuia hotel neitute leh sorkar lodge enkawltute chu an mikhual neih dan kimchangte leh an ID number-te  fel taka chhinchhiah turin a chah a ni.