Kan ram leh hnam hmasawnna atan Kan hmaah chona ropui tak a awm - CM

Information & Public Relation (IPR) department chuan nimin khan an auditorium-ah 'Media in the Digital World' tih thupui hmangin 'Mizoram Journalists Workshop, 2019' an buatsaih. Khuallian, chief minister Zoramthanga chuan, Mizo ram leh hnam hmasawnna turin chona ropui tak a awm thu a sawi.

Workshop hawnna inkhawm hi IPR director David L Thangliana'n a kaihruai a; Chief Minister chuan, Mizoram leilung leh sik leh sáte chu duhthusama ṭha a nih thu sawiin, "Ṭawng khat hmang, ram ralmuang tak kan ni. Kan hmasawnna tura kan tih tur pawimawh tak chu kan ngaihtuahna thlâk thleng a ni. Israel aṭangin mi nuai 10 chem tum nen ringawt kan ramah lo pêm se, kan ram hi ruak vek ni se, kum 10 chhungin India rama per capita sang ber an ni ngei ang," a ti.

Zoramthanga chuan, Chhura'n 'Náa chu ni se,' a tih ang chu hmasawnna dâltu a ni tih sawiin, "Israel-te kan ramah awm se, kum 10 chhunga per capita sang bera an nih theih kan rin chuan, eng nge kan tih ve mai loh ang. Kan ram hmasawnna atan hian ro hlu 
ṭha tak kan nei a ni," a ti a; thuthar thehdarhtute chu ram hmasawnna atana thawhpuiah a sáwm.

Chief Minister chuan, kawng chi hrang hranga sorkar leh journalist an thawhho chuan hmasawnna ropui tak hnuh tur a awm theia a rin thu a sawi a, "Media hi a ṭangkai tawh em em a, media hmanrua chu in ni. A chhe lam leh a ṭha lamin in kalpui thei a, a chhe lama in kalpui chuan a tuar tur zingah in fate pawh an tel ve a ni," a ti.

Chanchinbute'n khawtlang nun siamṭhatna turin 'social education' huang nei thei se a duh thu sawiin CM Zorama chuan, social education huang awm se chuan, chanchinbu tingaihnawmtu leh ram leh hnam tana hlâwk tak a nih ngei a beisei thu a sawi.

Khualzahawm Lalruatkima, IPR Minister chuan, journalist-te chu an news-ah exclusive lehzual a duhpui thu sawiin, "Chu chu mipuiin kan chhawr lehzual ang a, journalist-te zahawmna pawh a chawi sang leh zual hle ang tih ka ring. Tunlai khawvelah social media-ah thu a tam a, tu mai pawh hi reporter kan ni vek emaw tih mai tur a ni. Chuvangin, journalist-te thuziak chu a danglam tur a ni a, credibility a nei tur a ni," a ti.

Journalist-te chu sorkar kut leh ke pawimawh an nih thu sawiin IPR Minister chuan "Sorkarin policy leh ruahmnna a siam reng reng zir chiang a, lo thehdarhtu hmanraw ṭangkai tak in ni a, sorkar nen hian innghêng reng, inhlat thei lo kan ni," a ti a; sorkarin journalist-te aṭangin constructive criticism a beisei thu a sawi.

MJA president Zonunsanga Khiangte pawhin thu sawiin, "Mizoram journalist-te aia sorkar thawhpui ṭha an awm kher lo ang, kan pro government lek lek em kan ti zawk ṭhin. Sorkar hi thawhpui a ṭul hunah kan thawhpui a, khalh ngil an ngaih hunah kan khalh ngil tur a ni," a ti.

Workshop-ah hian chawhnu lamah IPR joint director C Lalnun­kima kaihhruaina hnuaiah Mizoram University-a Department of Mass Communication assistant professor Dr Irene Lalruatkimi buatsaih 'Media in the Digital World' thupui zirho a ni.