USA palai a lo zin, pisa pathum a tlawh
India rama United States of America (USA) ambassador Kenneth Juster chu Ningani khan Aizawlah a lo zin a, nimin khan pisa pathum - Zarkawta SHALOM office, Mizoram Synod office leh Excise & Narcotics commissionerate-te a tlawh.
SHALOM pisa a tlawhnaah Kenneth Juster chu Centers for Disease Control and Prevention aiawhin Dr Melissa Nyendak, National AIDS Control Organisation hnuaia Targeted intervention deputy director Dr Bhawani Singh, Mizoram State AIDS Control Society project director Dr Lalthlengliani ten HIV/AIDS venna kawnga hmalakna hrang hrang leh Mizoram dinhmun an hrilh.
SHALOM chief executive officer Dr Chawnglungmuana’n Mizo ṭhalaite zinga HIV/AIDS vei zat leh SHALOM hnathawh dan tlangpui a tarlang. US Ambassador hian Synod office a tlawhnaah thu sawiin, “Mizoramah kohhranin dinhmun pawimawh tak a chelh a, India rama ka zinna hrang hrangah pawh sakhuana leh hnam zia tarlanna hmun ka tlawh ṭhin,” a ti. Synod moderator Rev. R Lalhmingthanga kaihhruaina hnuaiah India rama sakhaw tênau zawkte’n harsatna an tawh ṭhin chungchang an sawiho zui a ni.
Excise & Narcotics department pisaah chuan assistant commissioner Peter Zohmingthanga’n an hnathawh dan tlangpui a hrilhfiah. Mizoram chu a awmna hmun avangin ruihhlo tawlhrûkna atana hman a nih ṭhin thu te, department-in ruihhlo, silai leh rangkachak a man zat te, Mizo ṭhalaite zinga damdawi hman sualna a tam telh telh thu te, mipuite hnena ruihhlo leh a kaihhnawih dang chungchanga inhrilhhriatna neih tam a ṭul thute an sawiho.
US Ambassador hi Kolkata-a US Consul General Patti Hoffman, public affairs officer Jamie Dragon leh assistant public affairs officer Jay Treloar ten an ṭawiawm a, nimin khan Mizoram an chhuahsan a ni.