MIMER zirlaite’n MIMER tih zel an duh

MIMER Students Union chuan, an college hming Mizoram Institute of Medical Education and Research (MIMER) tih, Zoram Medical College (ZMC) tia Mizoram sorkarin a thlak chu sût a, a hming ngai puttir leh turin Chief Minister an ngen. May 16, Ningani khan thuchhuah siamin, MIMER hming thlak an duh loh thu an tarlang bawk.
MIMER SU press release chuan, April 22, 2019-a Council of Ministers meeting-in MIMER chu ZMC tiha thlak ni se, tia a pawm chu an duh loh thu a tarlang a, “Keini MIMER SU-te chuan college hming thlak avang hian zirlaite leh college hna kaltluang lai tan buaina leh harsatna tam tak thleng thei a nih avangin hming thlak hi kan duh lo em em a ni,” a ti.

Mizoram sorkar chu MIMER hming thlak chungchang a thara ngaihtuah leh tura ngenin MIMER SU chuan, “College hming thlak hi a ṭulna chhan ṭha tak hriattir kan la nih loh avangin keini MIMER-a MBBS zirlaite chuan kan college hming thlak a nih loh nan a ṭul ang anga hmalak kan tum a ni,” an ti a; sorkar chu MIMER hming thlak tawh sût turin an phût a ni.

MIMER SU hian May 7, 2019 khan Chief Minister lehkha thehlutin, MIMER hming, ZMC  tia thlak chu sût turin an ngen a; “April 22, 2019-a Council of Ministers meeting-in MIMER chu ZMC tiha hming thlak ni se’ tia a lo approve tawh chu keini SU, MIMER chuan thlak loh ni se kan ti. College hming thlak hian zirlai te, thawktute leh college tana harsatna leh buaina tam tak a thlen theih avangin, a thara min ngaihtuahsak leh turin kan ngen a che. Kar khat chhunga hmalakna kan hmu lo a nih chuan, a ṭul angin media lam thlenga hmalak chhunzawm zel kan tum a ni,” tiin an ziak.

MIMER hming thlak chungchangah hian director Prof. L Fimate chuan ‘Zoram Medical College’ tih letter head hmangin May 14, 2019 khan circular a tichhuak a, MIMER tih chu Zoram Medical College tiin official-a thlak a nih thu a tarlang  MIMER Students' Union-in Chief Minister hnena lehkha an thehluhah chuan MIMER hming, ZMC tia thlak vanga harsatna thleng theite chi 10 an tarlang.

MIMER-in nikumah Medical Council of India (MCI) aṭangin college bul ṭan phalna Letter of Permission (LoP) a hmu a, first renewal pe turin May 3, 2019-ah MIMER chu endik leh a nih tawh thu an tarlang a ni. An tarlan danin, MIMER tan regis­tration dil ṭan a nih aṭanga LoP hmuh a nih thlengin lehkha pawimawh reng reng MIMER hming vekin MCI-ah thehluh a ni a, first renewal atana MCI-in an endiknaah pawh lehkha pawimawh zawng zawng MIMER hming vek a ni. Document, college seal leh letter head zawng zawng MIMER hminga thehluh vek tawh a nih thu sawiin, "MCI record-ah college hming thara siamṭhat leh chu thil tih theih a ni tawh dawn lo," an ti.

MCI-in record a kawl leh registration buaipuina zawng zawngah MIMER hming vek a ni a, chu'ng zawng zawng thlaktir leh vek chu thil harsa tak turah an ngai. Document ṭhenkhata MIMER, ṭhenkhat danga ZMC tih a nih chuan, MCI-in an pawm theih an ring lo. Sum duhkhawp hman tur a awm loh avangin tun dinhmunah MIMER chuan MCI mit a la tlung lo a, buaina dangin a belhchhah chuan registration an dil mek chu MCI-in an tih fo tawh angin an hnâwl mai an hlauthâwng a ni.

MIMER-a MBBS zirlaite chuan, first semester examination an paltlang tawh thu leh first year university examination an hmabak mek thu sawiin, chu'ngah pawh chuan an inziah luhnaah MIMER tih vek a nih thu an sawi a, "College hming hi thlak a nih chuan kan result hi MCI lamin a pawm a rinawm loh a, zirlaite first year certificate, marksheet leh record-ah MIMER tih a nih laiin, kum hnihna second year-ah certificate, marksheet, etc.-ah ZMC tih a nih leh si chuan, nakin zelah zirlai pass chhuakte pawhin harsatna kan la tâwk thei dawn a ni," an ti.

An tarlan danin, MBBS zirlaite'n mitthi ruang an zai tur lak luh theihna tura Mizoram Assembly session hnu­hnung berin Anatomy Act a pass-ah pawh MIMER tih a ni a, college hming thlak a nih chuan, kum khat tal nghah belh leh a ngai turah an ngai a, chu chu MBBS zirlaite harsatna thlentu tur a ni.