Jail-ah Summer Olympic buatsaih

Kolasib District Legal Services Authority (KDLSA) buatsaihin nimin khan Kolasib District Jail-ah tángte pualin Summer Olympic 2019 buatsaih a ni a, KDLSA member secretary Lalrinpuii, senior civil judge-in a hawng.

Lalrinpuii chuan, jail-a awm mekte chu pawikhawihtu an la ni vek lo a, ṭhenkhat chu thil sual tia puh, rinhlelh an nih avanga jail-a awm an nih thu leh, society pawhin a en hran loh thu a sawi a, "He laia kan awm chhan chu kan nun siamṭhatna turin a ni a, ruih theih thil lakah leh mipat hmeichhiatna lakah kan fihlim theih nan hun remchang a ni zawk tih kan hriat a ngai," a ti.

District Jail Summer Olympic-ah hian infiamna chi hrang hrang - volleyball, inhruipawh, spoon race, musical chair leh relay race hmangin intihsiak a ni. Kolasib District Jail-ah hian mipa ward pali leh hmeichhie ward pakhat a awm a, mi 114 tàn theihna ni mah se, kum hnih kal ta vel aṭang khan mi 160 vel awm reng ang a ni. Tunah hian mipa 166 leh hmei­chhia 19, an vaiin mi 185 an táng mek.