Mizoram sorkarin thla 12 chhungin RBI aṭangin ṭum 31 sum a puk
Mizoram sorkar chuan thla 12 chhung, February 2020 aṭanga January 2021 thleng khan Ways and Means hmangin Reserve Bank of India (RBI) aṭangin ṭum 31 sum a pûk a, a pûk zat belhkhawm chu cheng vbc. 512.80 a ni.
Vanglaini thu dawn danin, Mizoram sorkarin February 2020 - January 2021 chhunga Ways and Means hmanga sum a pûk tam ber ṭum chu October 16, 2020-ah a ni a, cheng vbc. 99.64 a pûk. A pûk tlem ber ṭum, December 4, 2020-ah cheng nuai 52 a pûk thung.
Nikum February aṭanga kumin January thla inkarah vêk Mizoram sorkar chuan RBI aṭangin Ways and Means hman hmaa RBI aṭanga sum pûk theihna Special Drawing Facilities hmangin ṭum 13 sum a pûk bawk a; a pûk tam ber ṭum June 4, 2020-ah cheng vbc. 42.34 pûkin, a pûk tlem ber ṭum December 7, 2020-ah cheng nuai 103 a pûk a ni.
Vanglaini thu dawn danin, state sorkarin a sum dinhmun a ṭhat loh chuan RBI aṭangin a pung awmin sum a pûk thei a; sum pûk theih dan hi chi thum - Special Drawing Facilities (Special Ways and Means tia hriat ṭhin), Ways and Means leh Overdraft-te a ni. Sum pûk theih bituk zat leh a pung tam dan a inang lo.
State sorkarin RBI aṭanga sum a pûk dawn chuan, Special Drawing Facilities hmangin a pûk hmasa ber tur a ni a, a pung pawh a tlem ber. Sum pûk chu a rùl thei lo a nih chuan Ways and Means hmangin a pûk leh thei a, a la rùl thei lo cheu a nih chuan overdraft hmangin a pûk leh thei. Overdraft hnua a rùl thei lo a nih chuan state treasury khàr a ngai tawh ṭhin.
Special Drawing Facilities leh Ways and Means hmanga sum pûkte chu ni 90 chhunga rulh tur a ni a, overdraft hmanga sum pûk chu ni 21 chhunga rulh tur a ni thung.