Covid-19 vei Mi pakhat a thi

Covid-19 vei Ratna Gurung (54), Venghlui, Aizawl chu March 17, Nilaini zan dar 11:40 khan State Referral Hospital (ZMC)-ah a thi a, Mizorama Covid-19 vei thi 11-na a ni.

Sorkar thuchhuah tarlan danin, Ratna Gu­rung hi March 11, 2021 khan Silchar aṭangin Mizo­ramah a rawn haw a, a rawn haw hma, March 6-ah Silchar-ah Rapid Antigen Test hmanga a swab sample endikah a negative a ni.

Aizawl a thlen hnuah Covid-19 symptom a neih avangin private hospital pakhatah Nilaini khan inentir turin an kal a, a swab sample endik leh niin, Covid-19 positive a ni tih hmuh chhuah a ni. Hripui vei a ni tih finfiah a nih hnuah SRH-ZMC-ah dah luh nghal a ni a, zan dar 11:40-ah a thi a ni. Amah hi thisen sáng nei sa leh pneumonia nei tel a nih thu sorkar thu­chhuahin a tarlang. 

Venghlui Local Task Force hruaitute hnen aṭanga thu dawn danin, LTF ruahman angin Ratna Gurung-i ruang hi nimin zing khan SRH-ZMC aṭangin khawtlang hruaitute'n an la a, an inah luhpui loin thlanmualah vui nghal a ni.

Venghlui LTF hruaitute chuan, Ratna Gurung hi March 14 khan Aizawl Civil Hospital Casualty-ah a inentir tawh bawk tih an tarlang a; March 14 leh 17-a damdawi-ina an hruainaa taxi an hmante chu an hriat mai theih rih loh thu an tarlang bawk.