Mizoin mau kan tih ang hi Chìn kan tum lo - CM Zorama
Assembly budget session neih zawh tâk tàwp ni, Nilaini khan chief minister Zoramthanga chuan a department enkawl demand-te sawihona a khaikhawmnaah, Mizoin mau an tih ang chi chìn an tum loh thu a sawi.
Chief Minister chuan, Mizoin mau an tih ang chu banrêk tiat lek lek a nih thu sawiin, "A lian páwl pawh ban puam tiat a ni a, mi pakhatin pum 10-15 put theih a ni. Chu ai chuan raw lian chi, pum khat pawh mi pathum deuh thawin put ngai chìn kan tum. A inhlâwk hleih em mai. Hmànlai Mizo ar aiin broiler leh layer-te sumdawnna tak tak atan chuan kan duh zawk angin," a ti.
Mizoramah mau a tam tih ngawt chi a ni lo nia sawiin Zoramthanga chuan, "Kawng bula mi an la zo a, lui ruama mi put a ngai," a ti a, Mizorama industry-te chu raw material awm loh avangin an din ṭhup thu a sawi.
CM Zoramthanga chuan, mau chìn an tum ang chu mahni huana tlem tlem phun an awm tih loh chu India ramah pawh a tam loh tur thu a sawi a, "Sorkar level-a beihpuia bei chu ka hriatah chuan an awm lo. Entawn tur pawh an awm lo a, kan dap chawp tak tak a ni. Tihsual ṭum pawh a awm," a ti.
Chief Minister chuan, mau chi tissue culture-a siamtu Growmore Biotech Ltd.-te chu Mizoramah inbun tura a sàwm thu sawiin, "Transportation a thui avangin mau chi thi a tam a ni. Chuvangin, Mizoramah inbun turin kan sáwm a, ram kan lo pe ang che u kan ti," a ti a; theihtawp chhuaha ṭanho an tum mek thu a sawi a ni.