Saitual district DRDA pisa hawng

Minister R Lalzirliana chuan nimin khan a bial chhung, Saitual Venglaiah Saitual district DRDA pisa a hawng.

Hawnna inkhawm Saitual College auditorium-a buatsaihah R Lalzirliana chuan, Saitual district-in DRDA pisa a neih theih nan chief minister Zoramthanga leh RD minister Lalruatkima ten theihtawp an chhuahpui avanga an lawm thu sawiin, "District danga DRDA pisa kum tam tak awm tawhte nen khaikhin nghal mai a rem dawn lo a, mipui ṭawiawmna leh hriatthiamna an mamawh hle dawn a ni," a ti.

R Lalzirliana chuan, DRDA pisa chu Saitual district thar hawn hnua sorkar department pisa hawn parukna a nih thu a sawi a; District Research Officer pisa leh Sericulture pisate pawh hawn thuai beisei a nih thu a sawi bawk.

Rural Development minister Lalruatkima pawhin thu sawiin, Saituala DRDA pisa chu Mizorama DRDA pisa pakuana a nih thu a sawi a; district hmasawnna turin DRDA-in hma a la ṭan dawn tih sawiin, "Mipuite ṭawiawmna a pawimawh. A tirah beisei angin thil a kal tluang nghal pur pur thei lo a nih pawhin dawhtheihna leh hriatthiamna nen ṭha taka thawktute finchhuah a ṭul," a ti.

Saitual district DRDA pisaah hian APO, AE, AO leh JE telin thawktu 20 velin bul an ṭan dawn a; Saitual district additional DC Margaret Lalrinawmi Fanai chuan project director hna a kawp rih dawn a ni.