YMA Sub-Hqrs. pisa hawng

Rural Development minister Lalruatkima chuan nimin khan Saitual Bazar Vengah YMA sub-headquarters pisa a hawng.

Lalruatkima chuan YMA-a thawkho ṭhinte chu mahni hamṭhatna zawng lo leh mahni inhaivur zawnga hma la ngai lo, tlawmngaihna nen midangte tana inphal taka thawk tlang ṭhin an nih avangin an inngaina bik ṭhin tih sawiin, "YMA-a rinawm leh dik taka kan thawh ang hian kan awmna hmun leh kan hnathawnna apiangah rinawmna leh dikna kan ken tlang zel a pawimawh a ni," a ti.

YMA sub-headquarters, Saitual hi January 22, 2021-ah din a ni a, a hnuaiah YMA group panga - Tuiphal, Tuivai, Tuivawl, Ṭamdil leh Mawmrâng an awm a; YMA branch 41 leh YMA member mipa 12,972, hmeichhia 9,045 leh life member 258, an vaiin member 22,275 an awm mek a ni.