Tuirial HEP zângnadawmna atan Cheng nuai tél a ngaih belh dawn
Tuirial Hydro Electric Project (HEP) siamnaah Gauhati High Court (GHC), Aizawl Bench thutlukna angin Mizoram sorkarin zangnadawmna atan cheng nuai tél a sèn leh a ngai dawn. Zangnadawmna pek belh ngai zat tur hriat theih a ni lo a, cheng nuai 3,000 a chuang ngei dawna sawi a ni.
Vanglaini thu dawn danin, Mizoram Chief Secretary-in August 5, 2016-a order a chhuah leh January 28, 1965-a notification a tihchhuah Section of the Mizo District (Forest) Act, 1955 chu mi 681-in GHC, Aizawl Bench-ah an khing. Sorkar order leh notification hi Court chuan a tibo a; hei vang hian mi 681 hnenah zangnadawmna cheng nuai 3,000 chuang Mizoram sorkarin a sên belh leh a ngai dawn a ni.
Chief Secretary order leh January 28, 1965-a notification ang chuan, Tuirial HEP siamna atana ram lak sak mi 681-te ram chu Forest Reserved chhunga awm a nih avangin zangnadawmna an dawng thei lo. Mahse, mi 681-te chu GHC-ah hian an zualko a, Court chuan tun hnai khan thutlukna siamin, mi 681-te chu an chak. Hei vang hian mi 681 hnenah Mizoram sorkar chuan zangnadawmna a pek a ngai dawn.
Mi 681-te chu kum 2002 leh 2003-a ram lâk neitute an ni a, Vanglaini-in a hriat theih chinah, a pung tel loa (ram an lâksak man) zangnadawmna pek ngai chu cheng nuai 2,000 chuang a ni a, pek ngai zat chiah hriat chian theih a ni lo. Kum 2002 leh 2003-a ram lâksak an nih tawh avangin an ram hlutna leh a pung chu a inzat deuh thuak tawh dawn nia thu dawn a ni.
Vanglaini-in a hriat theih chin zangnadawmna (a pung telin) pek ngai ringawt hi cheng nuai 3,000 a chuang dawn a, hei bak pawh hi zangnadawmna pek ngai tur eng emaw zat a la awm.
GHC, Aizawl Bench thu angin mi 681-te chu Aizawl District Court-ah an kal leh mek a, Mizoram sorkarin pawisa a pek hun tur tihfel a ni dawn. Sorkarin sum a pek har chuan a pung a tam telh telh dawn a; hun tiam chhunga sorkarin a pek loh chuan sorkar bungrua lilàm a, chuta ṭanga sum hmuhte chu zangnadawmna atana hman a ni ang.
Hetih lai hian, Assembly session neih zawh tâkah khan INC member C Ngunlianchunga zawhna ziaka P&E minister R Lalzirliana'n a chhannaah, Tuirial HEP zangnadawmna chungchangah sorkarin court sang zawkah kal tumna a neih loh thu a tarlang a, "Court order angin petitioner-te hnenah hian zangnadawmna pek dan tur ngaihtuah mek a ni," a ti.