Inthlan hun sawn turin ngen

Serchhip biala Assem­bly by-election neih hun tura ruat, vote thlak ní April 17 leh vote chhiar ní May 2-te chu Kristiante ni serh a nih avangin sawn turin chief minister Zoramthanga, kohhran leh pawl ṭhenkhatte'n Election Commission of India (ECI) an ngen.

CM Zoramthanga chuan March 18, Ningani khan chief election com­missioner (CEC) Sunil Arora hnenah lehkha thawnin, Serchhip biala by-election hun leh vote chhiar hun sawn turin a ngen a; inthlan kaltlangpui a nih chuan mi tam takin vote an thlak loh phah theih thu a tarlang.

CM hian vote thlak hun chu April 16, 2021-ah sawn mai tur leh, vote chhiar hun pawh hun ruat sa May 2 hma ni khat emaw, ni hnih emawa sawn hma mai turin a ngen a ni.

Seventh Day Adventist (SDA) Mizo Conference pawhin nimin khan Serchhip bial Assembly by-election neih hun tur leh vote chhiar hun tur sawn tura ngenna ECI-ah ziakin an thlen a, "Inthlan hun leh vote chhiar hunte hi Sabbath leh Sunday-a tla lo tura tidanglam leh ngei turin thuneitute kan ngen a ni," an ti.

Serchhip Ṭhalai Pawl pawhin vote thlak ni leh vote chhiar ni sawn tura ngenna leh Inrinni leh Pathianni ni lo ruat tura ngenna ECI-ah ziakin an thlen.