Serchhip bialte an bial mi ngei MLA nei turin kan duhsak - Hawla

MPCC president Lal Thanhawla chuan nimin khan Congress party-in Congress Bhavan-a inkhawm an buatsaihah thu sawiin, Serchhip bial chu MLA atan an bial mi leh sa ngei nei tura an duhsak thu a sawi.

Dr Lal Thanhawla chuan, Serchhip biala MLA by-election turah an party chuan chak ringawt an tum lo tih sawiin, "Serchhip bialin an bial mi leh sa ngei an neih kan duhsak avangin Serchhip tlangval Pu PC Laltlansanga, bial tana mi chak tur mi kan dah. Bial hre chiangtu leh theihna zawng zawng pe ṭhin a ni a, bial mipui tana rintlak, upate leh ṭhalai zawk tan pawha thawhpui theih tur mi a ni," a ti. 

MPCC vice president Lalsawta chuan, party aiawh MLA-te'n invawnna ṭha tak an nei a, kalphung mumal tak zawh a nih theih nan thununtu neih a ngai tih sawiin, "Chutiang tur chuan sorkarna chelhtu leh eptu party-te'n mahni MLA thununtu tur Chief Whip leh Deputy Chief Whip kan nei ṭhin," a ti a; mahni chanvo leh nihna chu hriat loh palh theih a nih avangin inzir leh inthunun a ṭul ṭhin thu a sawi. 

Hachhek bialtu MLA Lalrindika Ralte pawhin thu sawiin, "Politics-ah kawng tawi tê chauh la zawh mah ila, ka tum ber chu Mizoram mipui hnena sorkar ṭha pek a ni. Congress party-ah hian ka tel ringawt lo a, ka tel chuan Congress party hian ram mipuite tan hmasawnna kawng khat tal a zawh ngei tur a ni. Congress party-ah hian mi ṭha leh rintlak tam tak an awm tih mipui hnena lantir hi ka tum a ni," a ti.