Chunglamin tui anga nghet lo a duh lo - MNF President

MNF president Zoramthanga chuan nimin khan Lungleiah Mizo Hnam Rûn a hawng a; thu sawiin, chunglamin ram hnûk chhuak turin tui anga nghet lo a duh lo niin a sawi.

MNF President chuan, hmun tin aṭangin an party-ah an kal khawm zel nia sawiin, "Inthlanna apiangah majority lain MLA, MP, VC, LC, AMC leh district council-ah chakna kan chang. Varparh arsi chu a êng zual zel a ni tih kha a thleng mek. Kumin hi kan diamond jubilee kum a ni a, MNF kan nih chuan kan lung hlui a lên a ṭul. Politics thli chhiain a len darh tawhte pawh kal khawm a hun. Tun hi kalkhawm hun a ni, kan inchhir lo ang," a ti. 

Chunglamin ram hnûk chhuak turin tui anga nghet lo a duh lo nia sawiin Zoramthanga chuan, "Mi nghet, rintlak party hi sorkar siam turin a duh. Mite pawhin an entawn sorkar din chhuak turin kan thawk dawn a ni. Pathianin hun rei tak harsatna min paltlangtir a, kan sorkar aṭanga rei lo têah hripui léngin min tibuai a, nikum kha damloh kum a ni. Kuminah hi chuan kan dam-kawr kum kan hmang chho dawn ta niin a hriat," a ti a, mi tinin malsawmna an dawn an duh thu a sawi. 

MNF President chuan, party dang chu a nghîn lai vek a nia sawiin, "He rama malsawmna hâi chhuak tur hian Pathianin min hman a tumzia hi i hria ang u. Covid-19 donaa kohhran leh NGO inpekna te, a thlawn vekin ramriah Mizo tlangval task force-te an duty tih ka hrilh chuan Prime Minister leh Home Minister-ten 'Mizote chuan eng pawh an ti thei ang' tiin min chung en hial. Ram thuthlung, hnam thuthlung leh lal thuthlung kan paltlang tawh a, malsawmna thuthlung kan paltlang dawn mek a ni," a ti.