Myanmar raltlan chungchang Central hotute hnenah thlen

Chief minister Zoramthanga tirhin Mizoram MP pahnih C Lalrosanga leh K Vanlalvena, Planning Board vice chairman H Rammawi leh MNF adviser Rosangzuala te chuan nimin khan Union Minister of State for Home Nityanand Rai chu a pisaah an hmu a; Myanmar ráltlân Mizorama lutte chungchang leh Aizawl khawpui laili aṭanga Assam Rifles-te Zokhawsanga insawn dan tur an sawipui.

Sorkar thuchhuah tarlan danin, Union Minister hnenah hian Myanmar sipai sorkar tihduhdahna avanga harsatna nasa tak tuar mek Myanmar mipui ṭanpui turin tun aia nasa zawka India sorkar a chêt a ṭul thu an thlen a, "India rama raltlan rawn lutte thawn haw rih loin, a ṭul ang zelin India sorkarin a lo chhawmdawl kan beisei a, kan ngen a ni," an ti a; Myanmar-a democracy tung ding leh tura beihna chu tun aia chak zawka thlàwp a ṭul thu an sawi. 

Aizawl aṭanga Assam Rifles sawn chhuahna tur Zokhawsangah engkim peih a nih tawh thu Union Minister chu an hrilh a; an insawnna tur programme siam turin an ngen a ni.

March 18, 2021 khan Mizoram sorkar mi pawimawhte hian Union Home secretary Ajay Kumar Bhalla pawh a pisaah an hmu bawk a; an thu thlente chu an ngaih pawimawh thu leh tihhlawhtlin ngei an tum thu a lo hrilh niin sorkar thuchhuah chuan a tarlang. 

Hetihlai hian chief minister Zoramthanga chuan nimin khan Lunglei a tlawhnaah khawchhak lam unaute kan rama raltlana an lo luh chuan Mizoram sorkarin a tuamhlàwm dawn thu a sawi. 

Chief Minister chuan, sorkar lai­puiin 'thawn lêt rawh u' an tih pawh a chhàn lêt thu sawiin, "Nimin khan na takin sorkar laipui pawh lehkha ka thawn. 'Kan inneih pawlh a, kan unaute an ni a, kan thawn let thei lo. An lo luh chuan ei tur leh chênna kan ngaihtuahsak dawn. Khawvelin China an huat lai taka Myanmar mipui, raltlante in phatsan mai chuan nakinah dem in hlawh mai ang' ka ti hial a ni," a ti.