Kawlphetha man tihsan sawiho

Kum 2021-22 atana Power & Electricity department-in kawlphetha (electric) hman man a bithliah chungchangah Joint Electricity Regulatory Commission(JERC) for Manipur and Mizoram chuan nimin khan Aijal Club-ah mipui ngaihdan lâkna (public hearing) a buatsaih.

State Advisory Committee chairman Lalchharliana Pachuau kaihhruaiin hearing-ah hian tlawmngai pawl hrang hrang aiawhte an tel a; P&E department officer-te'n kawlphetha pek chhuah kawnga department ruahmanna siamte leh kawlphetha hman man tihsan a ṭul chhante an sawifiah.

Kum 2021-2022 chhunga P&E department inenkawlna tura sum mamawh zat chu cheng vbc. 659.58 a ni a; kawlphetha hman man chu tuna hman mek aṭangin 41.92%-a tihsan tura ruahman niin, kawlphetha hman man tihsan hnua sum hmuh chhuah beisei zat chu cheng vbc. 485.31 a ni. Department sum mamawh indaih lohna phuhrûkna tura sorkar aṭanga hmuh beisei zat chu vbc 174.27 a ni bawk.

Sorkar thuchhuah tarlan danin, hearing-ah hian mipui aiawh kal khawm zingah ZPM political party chauhin power tariff tihsan chungchangah ziakin an ngaihdan Commission-ah an thehlut a ni. JERC chuan Covid-19 hripui vanga mipui harsatna tawh hre rengin mipui tan phurrit tlem thei ang ber turin kawlphetha hman man tihsan a nih a beisei a ni.