School Education Minister -in MBSE in thar sak tur lungphùm a phúm

School Education minister Lalchhandama Ralte chuan nimin khan Chatlanga Mizoram Board of School Education (MBSE) pisaah MBSE building thar sakna tur lungphùm a phúm.

Lalchhandama Ralte chuan, MBSE chu zirlaite'n zirna leh certification pawimawh tak an neihna kawnga kawngro sutu an nih thu sawiin, "Zirna lama thuneitu, academic authority in nih angin zirlaite quality siamna kawngah te, ram pum huap zirna kan el phakna turahte zirlaite buatsaihtu pawimawh berte zing a mi in ni," a ti a; in thar sakna tur chu zirna kawnga hmasawnna thlentu a nih ngei a beisei thu a sawi.

In sak thar tur hi tuna MBSE pisa epa in awm sa nen inzawma sak tur a ni a, in hman mek pawh thawm ṭhat tura ruahman a ni. Sum ruahman zat chu Rs. 8,32,97,207 a ni a, T Thanzauva, Electric Veng, Aizawl chu contractor a ni. Contractor hi February 3, 2021 khan work order pek a ni a, February 18, 2023-ah sa zo tura tih a ni.