FMGEW-in inkhawmpui an hmang

Federation of Mizoram Government Employees & Workers (FMGEW) chuan nimin khan Vanapa Hall-ah General Conference vawi 31-na an hmang a, Chief secretary Lalnunmawia Chuaungo-in a hmanpui.

Lalnunmawia Chuaungo chuan, Mizoram hmasawnna chahbi kawltu chu sorkar hnathawkte an ni tih sawiin, "FMGEW member-te'n mipui rawngbawltu public servant in ni tih in hriat reng a ngai. Sorkar inrêlbàwlna kalphung pawh hun inthlak danglam mil zela her rem a ṭul ṭhin a, tun aia awmze nei leh ṭangkai zawka hna thawh a nih theih nan system reforms kalpui a ṭula hriat a ni," a ti a; Mizoram leh mipui hmasawnna turah rilru leh ngaihtuahna sêng turin a chah.

FMGEW hian MJA kaihhruaiin kum 2021-23 chhunga hruaitu tur mi 10 an thlang nghal a ni. FMGEW hi November 24, 1973-a din a ni a, service association hrang 93 leh sub-headquarters pasarih an nei mek a ni.