Dr. Thangtea leh Bangladesh Minister-in Ramria insumdawntawnna an sawi dun

Bangladesh nena insum­dawntawnna chungchang buai­puia Bangladesh-a zin Commerce & Industries minister Dr R Lal­thangliana chuan March 21 khan Bangladesh Commerce minister Tipu Munshi a kawm a, insumdawntawn chungchang an sawi dun. Bangladesh Minister hi Commerce Ministry-a official-te'n an ṭawiawm.

Dr R Lalthangliana hian Bang­ladesh Minis­ter hnenah hian CM Zoram­thanga ngaih pawimawh mau lian chi a hlan a, an duh chuan Chittagong Hills tract-a ram ruak zau taka an chin ve theihna turin Zoramthanga'n ruahmanna a siamsak theih thu hrilhin, "Bangladesh nena kan insumdawn tawn theih hunah pawh thil ṭha tak leh mi tam tak eizawnna siam chhuak thei tur chu mau hi a nih ngei a beiseiawm," a ti. 

Mau baka insumdawntawnna tur atana ṭha tura a hriatte sawiin Dr R Lalthangliana chuan, "Hmarcha, sawhthing, teak, aieng, serthlum, lung (stone), kan thlai thar chhuah chi hrang hrang leh kan thiam thil siam chhuah chi hrang hrangte hi Bangladesh nen kan insumdawntawnna atan kan hman ṭangkai theih ngei kan beisei a ni,"  a ti. 

Dr R Lalthangliana chuan Kawrpuichhuah, Tlabunga border trade dinna tur atan hian Trade Facilitation Centre pawh sokarna an chelh hmasak hun laia an peihfel chu hawn a nih tawh thu sawiin, "Kawrpuichhuah panna kawng  pawh double lane-a blacktopping zawh vek a ni tawh. India sorkar official-te nen pawh a hmunah enfel a ni," a ti a, survey leh thil dang ṭul zawng zawng pawh ngawrh taka buaipui a nih thu a sawi.

Mizoram Commerce Minister chuan Bangladesh sorkar pawhin rang leh hmanhmawh taka an tihtur awm ang ang tur an tih ve thuai thuai a ṭul tawh thu sawiin, Bangladesh Commerce minister Tipu Munshi nena Kawrpuichhuaha Integrated Check Post (ICP) dinna tur hmun endun a rawt nghal. Bangladesh Minister chuan May, 2021 chawhnu lamah a hman tur thu a sawi. 

Bangladesh nena kan ramri dep ve veah awlsam zawka kan insumdawntawn theih nan Silsuri Tuipuibari Nunsuri leh Marpara Border Haat ah Bangladesh sorkar lamin an tih ve ngaite an tih thuai thuai a ṭul thu pawh sawiin Dr Thangtea chuan, "Silsuri hmuna border haat neihna tur phei chu Bangladesh sorkarin ramri thleng deuh thaw kawng an rawn sial chhuak tawh. Mizoram sorkar pawhin truck kal theihna turin Silsuri thleng kawng a ruahman tawh," a ti.

Silsuri Boder Haat hmun hi April chawhma lamah Bangladesh Minister leh Dr R Lalthangliana hian tlawh dun ngei ṭha an tih thu an sawi dun a ni.

Dr R Lalthangliana chuan MNF leh India sorkar inremna (Memorandum of Settlement, 1986) ah khan Mizoram chu a ṭhenawm ramte nen ramriah an insumdawntawn thei ang tih chiang taka a inziah thu sawiin, "Hemi tihlawhtling tur hian hmalak zel a ni ang," a ti.
Inkawmna an neih zawh hian Mizoram Minister leh Bangladesh Minister hian thuthar thehdarhtute kawmin, ramria insumdawntawnna chungchanga zawhna an neihte an chhang.