PWD kawng siam a ṭha tawk lo Siam ṭhat duhin YMA-ten an ti chhia

KDZKT Road tia hriat Khadacherra-Damcherra-Zamuang-Kawrthah-Tuilutkawn kawng siam mek chu a siam dan a ṭhat loh lutuk vangin Taitesena Group YMA-ten ABCI-te'n an siam mek Tuidam khaw bula black top chu a ṭhat tawk loh avangin nimin khan an ti chhia.Taitesena Group YMA resolution-in a tarlan danin, Tuidam khaw bula black topping hna thawh mek chu a chhuat fai tawk loh avang leh ruahsur chunga black top anih avangin duhthu a sam lo a ni. PWD leh YMA-te'n inremna an siam angin thla khat liamta kha kawng hi endik a ni a, Tuidam khaw hmar lam km. chanve vel chu a black top ti chhia a, ti ṭha leh tura ABCI-te hriattir an ni. ABCI-te'n kawng black top ṭha lo lai hi tichhia a, an siamṭhat duh loh avangin nimin khan hnatlangin an ti chhe ta a ni. Kawng siamna bill hi PWD chuan ABCI-te hnenah nimin thleng kha chuan an la pek loh thu tarlangin Taitesena Group YMA chuan, "Kawng hi siam ṭhat a nih hma chuan bill siam sak lo turin PWD te kan ngen a ni. Hnam dangten kan ram hmangaihna nei miah loa hna an thawhnaah hian Mizo zawng zawngte mahni theihna zawn ṭheuhah do a, ṭang tláng tlat turin kan inngen," an ti.