Zirtirtu 946 lak turah Dan ang thlapin kan kal dawn - EM
School Education minister Lalchhandama Ralte chuan, muster roll (MR)-a zirtirtu 946 an lak tur chu entawn tlaka dan ang thlapa kal an tum tih a sawi.Lalchhandama Ralte hian nimin khan Mizo Hnam Rûna inkhawmah thu sawiin, "MR teacher 946 lak thar turah sorkar chuan dan a zawm dawn a, party mi leh kan laka pangchangte pawh hei hi ka hrilh duh a ni; 'Pathian leh kan ram tan' titu kan ni a, entawn tlaka tih kan tum," a ti a; zirtirtu 946 an lak turah dan pawngsual an neih loh thu a sawi.Minister chuan zirtirtu an lak turah ZPM-in chuan thuthar thehdarhtute kawma ṭhahnem an lo ngaihpui thu a sawi a, "Hman ní maia sorkar Congress party-in kan ram zirna an hnutchhiah dan kan hria a, chuti chung chuan an ṭhahnemngaihna a lawmawm kan ti. An thusawiah mipui kaihhruai dik loh tumna a awm em aw, a tih theih thung," a ti.School Education Minister chuan, India ram zirna kalphungah training zo lote'n zirtirna an pe thei tawh lo tih an hriat thu sawiin, "Zirtirtu nghet la turin MTET neih a ngai tih kan hria. Tun ṭumah hian MR skill-II, trained teacher kan la dawn. Kan party mi la a, rei lo tea dah nghet tura min puh hi an rinthu mai a ni. Kan zirtirtu lak turah hian, a khaw mi, trained lak kan tum," a ti a; politics-a induhsakna engmah neih an tum lo tih a sawi.Zirtirtu an lak turah chuan Aizawlah chauh hna lak kalpui a ni dawn lo tih sawiin Lalchhandama chuan, "Zirtirtu hna diltuin an thawh duhna district ṭheuhah dilna an siam ang a, district tinah hna kan la dawn. Zirtirtu ṭhenkhat, rei lo tê an zawm hnua Aizawl luh kherh leh ṭhin ang kha tihbo kan duh a, an thawh duhna district-ah hna an dil a ngai ang," a ti.Lalchhandama Ralte chuan, "Mi ṭhenkhatin zirtirtu kan ngahin an hria a, a thar la loa sem rual turin an rawtna an siam tih kan hria. Mizoram hi khaw tê tak tê têa inbáwk hrang kan ni a, phai ram anga teachers people ratio chhût theih a ni lo. Hetianga rawttute rawt ang hian kal ila, zirtirtu pakhatin pawl tin an kawp leh dawn tihna a ni a, an sawisel leh tho ang" a ti a; zirtirtu an lak thar turte nen class tin daih zirtirtu pek an tum thu a sawi.