Heroin zuartu kum 10 táng dawn

Champhai Special Court-a judge R Vanlalena chuan nimin khan heroin hawng 30 leh gram 400 neitu Irene Siamrimawii d/o Vanlalmawia, Vaivakawn, Aizawla cheng mek chu kum 10 chhung jail-a táng tur leh Rs. 1,00,000 chawi turin a hrem.Siamrimawii hi July 11, 2017 khan Khankawn police checkgate-ah a chuanna motor aṭangin heroin hawng 30 leh gram 400 nen man a ni a; Siamrimawii heroin kawl police-in an man chu Rs. 15,00,000 hû a ni.Champhai police-te chuan an chhui zui a, thuhretute leh Forensic Science Laboratory test report leh document pawimawh dangte Champhai Special Court-ah an thehlut a; Court chuan he thutlukna hi a siam ta a ni. Sum a chawi tur hi a pe lo a nih chuan thla khat a tàn belh ang.