Vote chhiar chhung a rei dawn ERO-in mipui hriatthiamna a ngen

Lok Sabha MP inthlana Mizoram constituency RO Vanlalngaihsaka, Aizawl DC chuan, May ni 23-a vote chhiar tur chu a hun chhung a rei dawn vangin mipuite hriatthiamna a ngen lawk.  Vote chhiar tireitu tur hi Postal ballot kalphung thar, Electronically Transmitted Postal Ballot System (ETPBS) vang a ni a, result dik leh felfai zawk a awm theihna tura ruahman a ni. Returning Officer hian nimin khan Planning department-a conference hall-ah thuthar thehdarhtute kâwmin, Lok Sabha inthlanpui vote chhiar dan tur a hrilhfiah danin Mizoram páwn (India ram chhung leh ram páwn)-a awmte'n vote an thlak theih nan Electronically Transmitted Postal Ballot System buatsaih a ni a; chu chu internet aṭanga download-in, vote an thlak hnuah dâkah an thawn let a ni. MP inthlanah chuan Mizoram chu bial pakhat a nih avangin postal ballot/ETPBS vote chu Aizawlah chiah chhiar a ni ang.Election Commission of India (ECI) chhût dan chuan, ETPBS vote pakhat chhiar nan minute khat vel ngai tura ngaih a ni tih sawiin Vanlalngaihsaka chuan, "Kan ti chhin a, minute khat chhung chuan kan zo hman dawn lo a, minute hnih zel ngai turah ka chhût a ni," a ti a; nimina press mite a kawm hma thleng khan ETPBS 4,687 zinga 3,119 an dawng tawh tih a sawi.Aizawl SDO (Civil) K Laltlawmlova'n ETPBS leh vote chhiar dan tur a sawifiah danin, ETPBS hi service voter-te'n an hmang a, sipai leh police leh sorkar hnathawk dang, Mizoram páwna awmte an ni ber a, an nupui/pasalte'n an hmang thei bawk. Postal ballot pangngai ang deuh tho a nih rualin, internet aṭanga download a nih avangin a inang vek lo a, tih tur a tam zawk a ni.Lok Sabha inthlan turah candidate-te inhnuhdawh theih hun a tàwp aṭanga darkar 24 a ral hnuah ETPBS atana form-te chu website-ah dah a ni a, service voter-te'n vote an thlak hnuah Returning Officer hnenah dâk hmangin an thawn let a ni. ETPBS hi vote chhiar ṭan hun hma, May 23 zing dar 7:59 thleng pawm a ni ang.ETPBS form-ah chuan Quick Response Code (QR code) a awm a, chu chu vote chhiar dawnah a dik leh dik loh QR code reader hmangin an endik a, vote chhiarnaah hian QR code endikna tur 40 (endiktu tur mi 40) an awm. QR code endik a nih hnuah ETPBS/postal ballot chu a chhiarna tur Returning Officer dawhkanah thawn a ni dawn a, R.O room-a counting table pangaah chhiar tur a ni.Joint chief electoral officer H Lianzela chuan, ETPBS avang hian MP inthlana vote chhiar chhung a rei ngei a rinawm tih sawiin, "Vote chhiar chhung a rei a nih pawhin a chhan hi mipuiin an hriat chian a ngai a, kan inhriatthiam a ngai dawn a ni. India ram pumah pawh a rei turah ngaih a ni a, an rin dan phei chuan, zan dar 12 an thlen an ring a ni," a ti.Lok Sabha MP inthlana vote tlate hi Assembly Annexe, R Dengṭhuama Hall leh Govt. Aizawl College-ahte chhiar a ni dawn. Aizawl district-a Assembly constituency 14 awm zinga pakua chu Assembly Annexe-ah leh pathum chu R Dengṭhuama Hall-ah chhiar a ni dawn a; Aizawl West-I biala MP election leh Assembly by-election-a vote tlate chu GAC hall-ah chhiar a ni ang.Election hotute chuan, MP election vote chhiarnaah hian Assembly constituency tina polling station pangaa vote tlate VVPAT-in slip a print chhuah chhiar tur a nih thu an sawi a; EVM-a vote tla zat leh VVPAT slip zat inang lo a awm chuan, VVPAT slip zat rin zawk tur a nih thu an sawi bawk.