KHAWTHLIR

DC-in tlawh

Lunglei DC K Lalrinzuali chuan May 18, Inrinni khan South Vanlaiphai leilet Zaupui a tlawh a, loneitute fuihin, kuthnathawh chu hna zahawm bera khawvelin a ngaih, ram changkang apiangin an ngaisanga an hausakpui a ni tih a sawi. "Mizote zingah upa zawk leh kum tam zawk ten ram hna an thawk a, a ṭhalai zawk leh chak zawkte kan awl hlauh ṭhin hi thil zahthlak tak a ni," tiin, lo neituten harsatna an tawh phawt chuan DC hnenah zualko vat turin a chah a ni.

Tlan khap

Traffic SP chuan thupek chhuahin, Lok Sabha Election 2019 vote chhiar hun May 23, 2019 zing dar 7 aṭanga vote chhiar zawh a nih hma chuan Assembly Annexe building leh Tennis Court inkar kawngpuiah tlan a khap. Thupek hian inthlan leh vote chhiar kaihhnawiha phalna bik nei, chhiat­rupna thil, kângmei leh rîkrum kaihhnawiha duty, dan leh thupek pawimawh bika police duty chet velna a huam lo.

Vote chhiar zir

Lok Sabha MP inthlan­puia Lunglei district chhung constituency pasariha vote tlate chhiartu tur counting agent-te tan nimin khan Lunglei Convention Centre-ah training buatsaih a ni. Training hi Lugnleia Election officer James Lalnithanga'n a kaihruai a, district level master training TT Lalnunmawia'n vote chhiar tura inpuahchahna a sawifiah.

Thisen pe

Champhai Tlangsam Branch KṬP chuan nimin khan Champhai District Hospital tan thisen unit 20 an pe a, a petute mipa 17 leh hmeichhia pathum an ni. Aizawla Kanan Veng Branch KṬP chuan Inrinni khan Synod Hospital tan thisen unit 42 pein, a petute mipa 39 leh hmeichhia pathum an ni a; David  Zohmangaiha'n Mount Everest a làwn chhuah champha pual­in a ṭhiante nen Synod Hospital-ah thisen unit sarih an pe. PYD (UPC NEI) Mualpui Bialte'n MIMER-ah thisen unit 15 an pe bawk.

Thil zawrh khap

Aizawl DC chuan thupek chhuahin Aizawl Civil Hospital luh leh chhuahna dal a thil zawrh leh thil dah hnawk a khap. Thupek hi sut leh a nih loh chuan May 16, 2019 aṭanga ni 60 chhung a huam dawn a, thupek zawm lote chu dan anga hrem an ni ang.