Damlo phai pan zingah cancer vei an tam ber Sorkar hnathawkah zu kaihnawiha damlo an tam

Sorkar kum liam ta, 2018-19 chhunga sorkar hnathawk damlo, Mizorama inenkawl zingah zu kaihhnawih (alcohol related desease)-a damlo inenkawl an tam ber a, phai pan zingah cancer vanga damlo an tam ber thung.Mizoram State Health Care Society (MSHCS) chuan sorkar hnathawkte'n medical reimbursement (MR) bill an dil (claim) aṭangin natna chi hrang hrang zinga natna langsar zual 10 an chhinchhiah a ni. Mizoram bikah chuan, sorkar hnathawkte damlohna tam ber chu zu kaihhnawih natna (alcohol related) tia chhinchhiah a ni.Mizoram chhung bika inenkawl sorkar hnathawk damlo mi 994 an awm a, chu'ngte chuan MSHCS-ah an inenkawlna bill 1,156 an thehlut a ni. Damlote inenkawlna chu MSHCS-in an zir chian hnuah bill 1,153 an pawm a, bill pathum chu an hnâwl. Zu kaihhnawih natna vanga damlo mi 994-te'n inenkawlna bill an thehluh aṭanga sorkarin sum a sên zawng zawng chu Rs. 3,40,68,493 a tling.Phai lama inenkawlte natna langsar zual 10 a tarlan natna neite chu mi 846 an ni a, chu'ng zingah chuan cancer vei tam berin, mi 365 an awm. Cancer vei phai pantute hian an inenkawlna bill 605 chu MSHCS-ah an thehlut a, MSHCS chuan bill 601 pawmin, bill pali a hnâwl a ni.Cancer natna veite inenkawlna atan hian Mizoram sorkar chuan Rs. 6,27,40,742 a sêng a; chutih laiin, natna dang, a langsar zual 10 an tarlan veite tana sum sen zat chu (cancer telin) Rs. 14,64,30,899 a ni.MSHCS hotute chuan, Mizoram chhunga inenkawlte zinga natna an vei tam pakuana - chronic liver disease-a damlo mi 414 leh phai lama inenkawlte natna vei tam parukna (chronic liver disease)-a damlo mi 34 te, pasarihna (chronic kidney disease)-a damlo mi 38-te chu zu kaihhnawih natna zinga chhiar theih an nih thu an sawi bawk.