Hmasawnna leh ralmuanna atan Darlawn District siam a ṭul - DDDC
Darlawn District Demand Committee (DDDC) chuan, Mizoram hmar lam tlangdungin hma an sawn ve theih nan Darlawn district siam turin Mizoram sorkar an phût. Tharum thawhtu hel pawl hial a pian chhan pawh hmasawnna kawnga hnuchhawn luih an nih vang niin DDDC chuan an ngai.DDDC hruaitute chuan nimin khan Aizawl Press Club-ah thuthar thehdarhtute an kâwm a; an chairman PC Chhunga chuan, "Kum 1998 aṭangin Darlawn district siam kan duh thu sorkarah kan thlen tawh. Vawi duai lo kan hlawhchham hnuah, hmasawnna duh luat vangin, kan ṭhalai rualawt zualten ramhnuai an behchhan hial tawh a, HPC lo pian chhan pawh kha hei tho hi a ni," a ti.Darlawn district huam chin tura ngaih (demand area) chu assembly constituency pahnih, Tuivawl leh Chalfilh bial ṭhenkhat, khaw 39-te an nih thu DDDC chairman chuan a sawi a, "Mizorama district dangah chuan district khawpui aṭanga khaw hla ber pawh km. 100 huam chhungah an awm deuh vek laiin, Darlawn district atana demand area huam chhunga khua zaa sawmkua zet chu district khawpui Aizawl aṭanga km. 100 pawn lam veka awm an ni. Zokhawthiang leh khaw ṭhenkhat phei chu district khawpui aṭanga km. 200 aia hlaa awmte an ni. Chuvangin hmar lam mipuiten district headquarters dawr turin harsatna englai pawhin kan tawk a ni," a ti bawk.Darlawn district demand area chu state dang nena inrina hrûla awm a nih avang te, district headquarters a hlat vanga ni tin mamawh hmuh a harsat vang te, himna atana dan leh hrai kenkawh kawngah tun aia chak zawk an mamawh vangtein administrative district thar an neih thuai a ṭul tih PC Chhunga chuan a sawi a, "Mizoram hian hma sawn zel mah se, hmar thimpui hnuchhawn bial a awm chhung chuan hmasawnna khingbai leh kai rual lo a ni reng ang. Mizoram hmun dangte ruala hma kan sawn ve theih nan Darlawn district siam ngei turin Mizoram sorkar kan phut a ni," a ti.Zawhna chhangin DDDC Chairman chuan, Darlawn district siam an phût chungchangah hian DDDC hruaitute'n chief minister Zoramthanga ṭum hnih hmuh an tum tawh a, an la hmu thei lo ve ve tih a sawi a; Darlawn district siam an phût chungchang chu Council of Ministers-ah leh Chief Secretary hnenah ziakin an thlen tawh tih a sawi bawk.
• Hmar tlangdungin hma an sawn ve theih nan.• Tharum thawh hel pawl pian chhan hmasawn duh vang.• Kum 1998 aṭangin Darlawn district siam an duh thu sorkarah an thlen tawh.• Darlawn district huam chin tur Tuivawl leh Chalfilh bial ṭhenkhat khaw 39 a huam.• Khaw ṭhenkhat chu district khawpui aṭangin km 200 pawnah an awm.• State boundary nghenga awm an nih vangin hmasawn an mamawh zual.